Humanisme

Uut Wikipedia, de vrye encyklopedy
Nå navigaty springen Nå söken springen

Humanisme is ne ströyming in de filosofie wat uutgeyt van de kracht van en menske vöär sikselv en as grup. Et meynt at seriöös moreel en filosofisk denken begint by de menske.

Et begrip 'humanisme' is wal anders wörden seyd at et vöär et eyrste bruked wör en upeynvolgende intellektuele beweagingen der med an de gang güngen. Döär mekander verwist et når en uutgån en vyren van menskelike vryheid, selvbeskikking en untwikkeling. De menskheid, sou meynet humanisten, is verantwoordelik vöär et anjagen en untwikkelen van selvbeskikkende lüde. See sint vöär de lykheid en natuurlike waerdigheid van alle mensken en maket sik stark vöär de wyse wårup as mensken med de wearld ümmegåt.

Med den oorsprung in de 20. eywe sint humanisten döärgåns neet-gelöyvig en willet skeiding van ståt en karke. Üm de wearld te begrypen geyt humanisme uut van de menskelike besluutkracht en en terüggegrypen up weatenskap en denkkracht, in steade van ne oapenbåring van boavennatuurliken ård. Humanisten maket sik döärgåns hard vöär menskenrechten, meyningsvryheid, progressive regels en demokraty. Lüde med humanistiske ideen meynet at gelöyv ginnen grund vöär moraliteit hoovt te weasen en hebbet moide med inmenging van gelöyv in underwys en ståtsforming. Mensken, meynet humanisten, künnet selv bepålen wat öäre leavenswaerden sint en dårmed vervüllende leavens leiden.

Den oorsprung van humanistiske ideen ligget in de westerske wearld. Beginselen künnet al in olde-greekske wysbegeyrde vünden worden. Vergelykbåre ideen sint skounwal ouk in andere deylen van de olde wearld te vinden, sou as in et olde India, Noorweagen, südelik Afrika en China. Tydens de Europeeske Renaissance küm der vannys interesse in klassike greekske skryverye en kümmen humanistiske ideen weader når böäventen. Vöäruutgang in weatenskap, technology en filosofy in de tyd van de Verlichting verstarkeden de ideen van nen skeid tüsken karke en ståt. Et löyp uut up et untstån van vöäle denkströymingen en etiske beweagingen in de 19. eywe. En paar dårvan förmden sekulyre humanistiske grupen in de 20. eywe.