Havezate Oosterveen

Uut Wikipedia, de vrye encyklopedy

Havezate Oosterveen was een havezate, oftewal verstarkt huus, an 't Oosterveen, een weg in 't Aoveriesselse dörp Neilusen. 't Huus wördden tussen 1640 en 1646 dalezet in opdracht van Sweder van Haersolte, drost van Sallaand (1582-1643), veur zien zeune Rutger.

Bouw[bewark | bronkode bewarken]

De ontginning van 't vene waor now Neilusen lig wördden in 1631 in de haand eneumen deur de Leusener Compagnie. De eerste boerderijen van de neie nederzetting stunden an 't Pad, zoas toen 't Oosterveen enuumd wördden. Krap tien jaor later wördden der al een begun emeuken mit de bouw van havezate Oosterveen. Mit-eigenaren dervan waren de femilies Ripperda en Roelinck, mit-oprichters van de Leusener Compagnie. Ridderschop en Steden van Aoveriessel stemden dermit in um 't recht van havezate van Huus Dieze in Dalsen aover te heveln naor 't goed Oosterveen. Rutger van Haersolte was de neie havezate neudig um as edelman op 't plattelaand toegaank te kriegen töt peblieke ambten.

Latere geschiedenis[bewark | bronkode bewarken]

Rutger en zien vrouwe, Elisabeth Margaretha van Pallandt, hadden gien kiender. In 1663 schunken ze havezate Oosterveen as hielijkskedogien an heur neve Elbert Anthony van Pallandt en heur nichte Johanna van Haersolte. Elbert leut hum daornao heer van Oosterveen, Eerde en Egede numen. Ok zij kwamen zunder naozaoten uut de tied. In 1759 leut August Leopold van Pallandt 't recht van havezate verplaatsen van 't Oosterveen naor 't Hoijers of Nijenhuus in Junne. Huus Oosterveen had sindsdien niet langer de status van havezate.

't Huus raakte daornao in verval. De grond wördden verkocht en kwaamp uuteindelijk in bezit van de femilie Van Marle. In 1862 wördden 't huus ofebreuken. Op de plekke dervan stiet vandage de dag een woonboerderije.

Beschrieving[bewark | bronkode bewarken]

Havezate Oosterveen was een stienen huus mit veertien ramen en twee schösstienen. Der was een fikse hof bij, en der lag een grachte umhenne. In 1680 wördden der an de veurkaante nog een baovenverdieping bijedaone, die 'de toren' enuumd wördden.

Een schaalmodel van de havezate kuj op Neilusen bekieken in Museum Palthehof. Dizze maquette is ebaseerd op beschrievings, umdet der gien ofbielding van 't huus bekend was. In 2015 vund Neilusenaar René Fokkert in de arfgoedcollectie van de Rotterdamse gemientebieb asnog een ofbielding van havezate Oosterveen. 't Is een pentiekening van rond 1725 deur de Amsterdamse tiekender Jacobus Stellingwerff, mit as onderschrift: 'Oosterveen bij de Ommerschans'.

Bronnen[bewark | bronkode bewarken]

Dit artikel is eschreven in 't Zuudwest-Drèents.