Goastok

Uut Wikipedie, de vrye encyklopedy
Gao naor: navigasie, zeuk
Tweantsen Goastok
Haandvat van n goastok

Nen goastok is n tradisjoneeln Tweantsn waandelstok, den at vake te herkenn is an n gekruldn vörm van t hoolt. t Hoolt krig zinnen ekrulden vörm duurdet dr zik kamperfoelie um t hoolt ewikkeld hef en t hoolt hef dichte knepn.

Goastökke wordt hoaste neet mear emaakt, umdet de leu rechtevoort aandere materiaaln gebroekt um stökke te maakn en umdet ze de natuur al mear anpakt. Hierduur hef de kamperfoelie de kaans neet um zik um t hoolt hen te kruln.

Tradisie[bewark | bronkode bewarken]

Nen goastok was n teekn van anzeen en tradisie. Zo gungn brulfteneugers, dee at bie de femilie en könnigheaid an gungn um de leu oet te neugen vuur ne brulfte, aait met nen goastok op pad, woermet ze dan op de duurn klopn. Umdet ze dan as daank vuur de oetneudiging bie iederene nen borltjen kreegn, was n goastok ook neudig vuur de oonderstönnige. Ook bie groowes en grooweneugers gung n goastok met.
As dr n keend geboorn was, versierdn de vaa zinnen goastok met slingers, zodet iederene zeen kon det hee wat te viern har.

Ook op de koarmsel gung n goastok met, um denzelfden reedn woerumme de brulfteneugers um neudig hadn. Doarnöast is nen goastok n duchtig woapn. Bie de boern hung n stok boawn t berre, zodet ze t deenk direkt griepn konn as dr wat amparts vuur zol valn. Ook op de koarmsel kon t nog wal es op houwn oetloopn, en dan köm n goastok good töt zin rech. De bekeandste verhaaln hiervan komt van de boerskop Stokkum bie Moarkel. Doar warn de jongs vroger nog wal gaauw an ebraandt, en as jongs van boetn Stokkum dan te noa an de Stokkumse meakns kömn, dan köm t op houwerieje an.

Soortn[bewark | bronkode bewarken]

Dr beent feailik twee soortn goastökke. n Bekeandsn is den gedreeidn, mear in Moarkel hebt ze wat amparts. n Moarkelsen goastok is vake van Mispelhoolt, en recht. t Haandvat is versierd met gaanzepenn dee wordt verwöawn met zwart peardehoar, woerduur n zwart-wit skaakbordmotief ontsteet. Dee wordt of ewoarket met stuks lear an weerskaantn, en nen learn baand vuur um n pools.

Doarnöast beent dr verhaaln bekeand van de Broabaantse Teutn. Dit was n oarm kistnkearlsvolk dee at duur gebrek an groond duur verskeaidene laandn treukn, en doarbie ook n soort goastok hadn. Den was vake van binn hol emaakt, zodet dr n mes of lang knief in kon, woermet at ze zik dan teegn kwoadwilnde leu verdeadign konn [1]

Wieters köant alle soortn waandelstökke wal goastökke neumd wordn, mear vake wörd met "goastok" direkt noar n Tweantsn verweezn.

Zee ok[bewark | bronkode bewarken]

Verwiezings[bewark | bronkode bewarken]

  1. http://www.heijmerikx.nl/2007/06/23/teuten-en-todden/