Slim Kört Verhaal

TwentseWelle (tegenwoordig De Museumfabriek), ien van de organisatoren van een 'Skriefwedstried GKV'

Slim Kört Verhaal (SKV) of Gloepens Kort Verhaal (GKV) bint termen die in de Nedersaksische schrieverije mangs gebruukt wördt veur biester körte, al dan niet literaire verhaalties. Hoeveule woorden zokse verhaalties maximaal hebt, bint gien vaste riegels veur. De termen bint ent op de Nederlaandse term Zeer Kort Verhaal (ZKV), de betiteling waoronder de schriever A.L. Snijders dit genre begun 21ste ieuw in Nederlaand epopulariseerd hef.

Drenthe

Slim Körte Verhaalties kuj sinds jaoren nou en dan lezen in 't Drèentstalige letterkundige tiedschrift Roet, beveurbield van de haand van Ger Siks en Martin Koster. Van de Drèentse schriever Gerard Stout verscheen in 2013 bij zien eigen uutgeverije Ter Verpoozing de bundel Weense wals. Slim körte verhaolties.

Twente

In 2013 organiseerden de Kreenk vuur de Twentse Sproak en TwentseWelle een 'Skriefwedstried GKV'. Mitdingende verhalen muchen niet meer as 220 woorden tellen. De organisatie keus uut de inzendings 64 verhaalties, die bij mekare wördden edaone onder de titel De ofrekkening - Gloepens korte verhalen (2014, redactie deur Gerrit Dannenberg). In 2019 belegde de Kreenk mit de Bodbreef vanneis een GKV-wedstried. De verhaalties die det opleverde wördden ebundeld onder de titel De rekkenlineaal (2019).

Grunning

Op de Dag van de Grunneger toal op 16 meert 2019 gaf de Grunninger streektaalfunctionaris Ingeborg Nienhuis een workshop 'Slim Körte Verhoaltjes', waorbij 't antal van 99 woorden anehölden wördden. Volgens Bert Wijnholds, redacteur van 't Grunningstalige digitale tiedschrift Kreuze, was 't Nienhuis die zo 't Slim Körte Verhaal in de Grunninger schrieverije introduceerde. In Kreuze bint sindsdien aid wat SKVs te vienden.

In heur lessen Nederlaands op de middelbare schoele gebruukt Nienhuis 't Zeer Korte Verhaal um leerlingen te helpen heur taalverzörging en schriefveerdigheid te verbetern.

Uutgaonde verwiezings

• Slim Körte Verhalen in digitaal tiedschrift Kreuze
• Slim Körte Verhalen op de webstee van Bert Wijnholds

Verwiezings

Dit stok is eschreven in 't Zuudwest-Drèents.