Gerrit Dannenberg
Gerrit Dannenberg (ook bekeand oonder zinnen Riessensen skeeldnaam Gait van de Tute of Gait van Jejoos) is nen vuurmoalig skoolmeaster oet Riessen in Tweante en skriewer in et Tweants.
Loopbane
[bewark | bronkode bewarken]Dannenboarg begun as leraar Neerlaands op de middelbere skole en as journalist vuur et Tweantse blad 'n Roskam.
Seed 2008 hef hee een eagen tekstbureau, woerin as zinnen dochter Marieke ook nen zet metwoarken. Vuur opdrachtgevers skrif hee folders, brochures, toosproaken, webteksten en persberichten in Hollaands. As oondernemmers dat weelt köant zee alle skriefwoark ook ummezetten in Tweants.
Hee is rechtevoord 'n direkteur van et Riessens Museum. Doarnöast is hee in 'n deenst bie de Gemeente Riessen-Hoolten, as Buitengewoon Ambtenaar voorde Burgerlijke Stand (BABS). Dat leste dut hee op verzeuk ook in et Riessens.
In 2023 wör hee eridderd vuur zienen inzat vuur et Tweants en nog nen koppel vriejwilligerssteas mear.[1]
Tweants woark
[bewark | bronkode bewarken]Dannenboarg dut allerhande aktiviteiten in de bene helpen vuur et Tweants. In Riessen organiseren hee alle joaren 'n Tweantsen Oawend. Med zien moat Arie van Peardejan gavven hee alle joaren Tweantse cursussen, woerin at niejkommers in Tweante van allens oawer de kultuur en sproake te weten komt, en woerin at de vaste inwonners öare kunnigheaid met t Tweants wat anhalen köant. Bie de Kreenk vuur de Twentse Sproake bleus hee et inedutte ledenkwartaalblad Bodbreef niej leawen in, woervuur as hee regelmoatig biej bedriewe angeet um leu oawer öaren zaak te interviewen en te kieken wat zee met et Tweants hebt. Doarnöast skrif hee regelmoatig nen column vuur Hart van Rijssen-Holten en Twentesport.com en is hee nen Platten BABS, nen Buitengewoon Ambtenaar voor de Burgerlijke Stand, woermet as hee trouweriejen op verzeuk in et Riessens an mekaander kuiert.
In 2007 köm zien eerste book Harakierie oet; nen verhalenbeundel in et Tweants en in et Neerlaands. In 2007 wun hee de anmodigingspries van et domoalige TwentseWelle.[2] In 2021 gavven hee met Gerrit Kraa ne kleine verhalen- en gedichtenbeundel Taandtoargerieje oet, kort vuur at hee met een oawerzettingsproject terechte köm, oonder de name Eczeem. Hierin dut hee gedichten van bekeande skriewers dee't em anspreuken aandersumme oawerzetten; Nederlaandse in et Riessens en aandersumme.
Wieders is hee met een poar aandere Riessenders gangs um wat Biebelbeuke van 'n Tweantsen Biebel in et Riessens inesprökken te kriegen, zodat de Riessenders 'n Biebel in de egene sproake köant lusteren. Ende 2021 zatten hee met nog wat leu et Nedersaksisch- en Nederlaandstalig literair blad Lös veur op.
Skriewerieje
[bewark | bronkode bewarken]- Harakierie (2007)
- Taandtoargerieje (2021)
- Eczeem (2021)
| Bronnen / wellen: |