Egbert Hovenkamp II
Egbert Hovenkamp II (Eext, 1953) is een dichter, bieldend keunstener, publicist en radiomaker uut de Nederlaandse pervincie Drenthe. De II zet e achter zien name umdet e vernuumd is naor zien grofva.
Hovenkamp II, wie zien va boswachter was, gunk naor de mulo in Raol en in n Ham. Nao ien jaor havo had e alderhaande baanties via uutzendbureaus. Lange tied warkte e in de netuurvoedingsbranche. Onder meer veur Stichting Drentse Taol (de veurloper van 't Huus van de Taol) hef e vrijwilligerswark edaone.
As bieldend keunstener mak e collages, polaroids en opstellinkies. Ok mak e teksten veur T-shirts, zoas 't bekende 'As Drent binj altied stoned umdaj tussen hunebedden woont'. Zien wark hef e exposeerd in plaatsen as Stad, Assen en Winschoot. End jaoren negentig was e radiomaker en prissentator bij Radio Assen. An 't end van 't zundagmiddagradiopergram 'Podium' van RTV Drenthe gaf e zien kiek op een Drèents gedicht.
Sinds begun jaoren zeuventig publiceerde Hovenkamp II Nederlaandstalige teksten in bladen uut 't alternatieve circuit, zoas De kraakkrant, Aloha en Bres. Zien interesse veur de schrieverije in 't Drèents wördden ewekt deur de dichter en schriever Gerard Nijenhuis, naor wie hij ies eigen wark stuurde. In de Drèentstalige tiedschriften Roet en Oeze Volk publiceerde e poëzie. Zien wark viej ok in verscheiden bloemlezings. In eigen beheer gaf e onriegelmaotig een tiedschriffien en verscheiden boekies uut. De kleine oplaoge van zien in 1983 verschenen bundels Dweellochten en Plaots nemen gunk verleuren bij de braand van 't Schepershoes in Bal in 1998.
Nao alderhaand umzwarvings in noord- en oost-Nederlaand kwaamp Hovenkamp II in Assen te wonen, daor as e in 2008 stadsdichter van was. In 2011 wördden e gemientedichter van Aa en Hunze. Hij hef humzölf wal een terplekkepoëet enuumd. Wieder is e gaanks as vertaler; zo hef e Allen Ginsberg zien lange gedicht Howl in 't Drèents aoverezet as Galp. 't Huus van de Taol schrif daoraover: 'As Hovenkamp Galp veurdrag, rak 't publiek haost in trance deur de staccato-manier van veurdraogen.' Aover zien dichtwark in 't algemien schrif 't Huus: 'Hie lat in zien gedichten zien dat Drent-wezen, maatschappijkritiek, neimoods levensgevuul en muzikaliteit akkederen kunt in de Drentse schrieverij.'
Uut zien wark
[bewark | bronkode bewarken]Cuby zung hier zien blues
- de plaggehutten wörden flats
- de witte wieven
waren een veurtieken van toeristen en lege puutues.
[...]
Cuby zung hier zien blues
- de Hondsrug wör een route
- Klaosje I
was de draoger van bio-industrie.
&
Cuby zung hier zien blues.
(Uut 't gedicht 'De weg')
Dichtbundels
[bewark | bronkode bewarken]- Dweellochten (Assen, 1983)
- Plaots nemen (Assen, 1983)
- Kolde tocht (gedichten, aoverzetting van Wilhelm Müllers Die Winterreise, Beilen: Het Drentse Boek, 2008)
Bronnen
[bewark | bronkode bewarken]- Rouke Broersma (red.) (2003), Scheupers van de taol: Bloemlezing van de Drèentse Schrieverij 1837-2003, Zuudwolde: Stichting Het Drentse Boek (blz. 205-206)
- Huus van de Taol aover Egbert Hovenkamp II
|
Dit artikel is eschreven in 't Zuudwest-Drèents. |