Donald Trump

Oet Wikipedie, de vraaie enzyklopedie
Gao naor: navigasie, zeuk
Donald Trump

Donald John Trump (Niej-York, 14 juni 1946) is nen Amerikaansen zakenman, tellevisiekearl, skriewer en de 45ste presideant van Amerika. Hee is vuurzitter en oprichter van de Trump Organization, de holding vuur zinne vastgoodbedriewe. Hee bouwen kantoor-torens, hotels, gokhuuze, golfbanen en een stadsopbouwprojekt in Manhattan. Doarnöast bouwen hee verskeaidene aandere oonderkommens oawer de hele wearld.

Op egröaid in de wieke Queens van Niej-York, halen Trump zinne bachelorgroad in ekonomie an de Wharton-skole van de Universiteat van Pennsylvanië in 1968. Terwiel as hee doar nog noar de skole gung, woarken hee bie zin vaar's bouw- en vastgoodbedrief. Det nöm hee in 1971 oawer en herneumen et de Trump Organization.

Trump verskeen verskeadene moalen in films en tellevisieseries. Bie de Miss USA skoonheadswedstrieden, woervan as hee van 1996 töt 2015 eigenaar van was, treud hee ook verskeadene moalen op. Hee wol zik loaten nomineren vuur de Reform Party's presideantsverkiezingen in et joar 2000, mer treuk zik terugge toen as et echte kiezen anvung. Hee dreeien en hulp bie et maken van de realityserie The Apprentice op den Amerikaansen zeander NBC tusken 2004 en 2015. Trump en zinne oondernemmingen konnen aait op völle media-andacht rekkenen. In oktober 2016 steund hee 496sten op de lieste van riekste leu van de wearld.

In juni 2015 kondigen Trump an at hee met zol doon an de presideantsverkiezingen van de Republikeinse kaante. Hee leut rap zinne republikeinse tegenstaanders achter zik en wör formeel oet erop as de presideantskandidoat tiedens de Republikeinse Nasjonalle Gaddering van 2016. Trump zinne missie krig internasjonaal breden andacht. Völle van zinne oetsproaken in interviews, op Twitter en op biejeenkomsten stott leu vuur de skennen of bliekt neet te kloppen. Bie verskeadene biejeenkomsten leup et op houwerieje oet. Tiedens de vuurroondes deuk der ne opname van Trump up oet 2005, woerin as hee hoog opgavven oawer zinne seksuele vergriepen op vrouwleu. Verskeadene vrouwleu hebt um an eklaagd vuur verskillende groaden van vergriep. Trump sprung hoge en lege um et te oontkennen en deed et of as ne poging um zin kandidoatskop en anzeen nen slechten naam te gewen.

Trump voort verskillende peunten dee hee as presideant wil anpakken: de VS mut vanniejs met Sjina um toafel um oawer haandelsofspraken te kuiern, hee is tegen haandelsofspraken zo as NAFTA en de Trans-Pacific Partnership (Oawerzeese Samenwoarking), der mut strakkere immigrasiewetten kommen, hee wil ne mure tusken de VS en Mexiko bouwen, veteranenzorg mut better, vervanging vuur de Affordable Care Act en meender belasting. Noa de Anslagen van Paries in 2015 wol Trump een tiedelik verbod op invlocht van Moslims in de VS. Later dreeien hee et zo det et verbod eankel zol geelden vuur leu oet laanden met een bewezen verleden in terrorisme. Pas as der ne gode moatstaf oontwikkeld was um der meugelike terroristen tuskenoet te halen, zol et verbod der achterhen goan.

Tegen völle verwochtingen in wun Trump in november 2016 de verkiezingen van zinne demokratiese tegenstaandster Hillary Clinton.