Dieren (Gelderland)

Dieren is n plaats in de gemeente Rheden, in de Nederlandse provinsie Gelderland. Dieren ligt in-eklemd tussen de heuvelachtige bossen van de Veluwezeum en de rivier de Iessel. t Dorp wörd deursnejen deur de spoorlien Arnem-Zutfent en de drukke provinsiale weg N348. Ook kömp t zudelike stuk van t Apeldoorns Kanaal der op de Iessel uut. t Had begin 2013 rond de 15.500 inwoners.

Geschiedenis

De eerste vermelding van Dieren stamt uut 838, as "Theothorne".^[1] In Dieren stond eeuwenlang n uut de middeleeuwen daterend jachtslot: Hof te Dieren. Anvankelik was dit eigendom van de ridders van de Duutse Orde, later kwam t in handen van de Oranjes. In de 17e en 18e eeuw verbleven de verscheiene Willems der vaak veur de jacht. Um de kansen bie de jacht te vergroten wier der n alderbarstends groot stuk bos en heed umringd mit n holten schutting. Binnen disse wildbaan konden dan harten en wilde varkens lös-elaoten worden. Tiejens de Franse bezetting is t grote jachtslot deur feestende Franse soldaoten af-ebrand. Begin 19e eeuw was der n kleiner gebouw veur in de plaats ekommen.

Toerisme

Dieren ligt an de rand van t Nasionaal Park Veluwezeum en ie kunt der urenlange wandelingen en fietstochten maken. Prinsen hadden hier heur jachtdomein - now nog herkenbaar an de lange alleeën, waordeur t jachtgezelschap gauw op de bestemming kon kommen. n Markant punt is de Karolinabarg mit 14 laonen.

In Dieren he'j de Spelerij en de Uitvinderij, n populaere bestemming veur schoolreisjes. Op stasion Dieren begint t trajekt van de Veluwse Stoomtrein Maotschappieje (VSM) dat via Eerbeek en Bekbargen eindigt in Apeldoorn.