Boris Johnson
.jpg)
Alexander Boris de Pfeffel Johnson (Ny-Jork 19 juni 1964) is nen britsken politiker van de Konservative Partye, geskeedkündigen, skryver, journalist en van 2019 töt 2022 eyrsten minister van et Vereynigd Köäningryk. Vöärtyds was hee börgemeister van Londen en seyt 2015 lid van et Laegerhuus. van den 13. juli 2016 töt an den 9. juli 2018 was hee Minister vöär Butenlandske saken en et Gemeynebest vöär et Kabinet-May I en II.
Up den 23. juli 2019 wör Johnson döär tweydarde van de leyden köäsen as nyen partyleider. Dårmed volgden hee Theresa May up as eyrste minister van et Vereynigd Köäningryk.
Leavensbeskryving
[bewark | bronkode bewarken]Boris Johnson is ne achterkleinsöäne van Ali Kemal, nen türksken journalist den as an et begin van de 20. eywe nen körten tyd minister van Binnenlandske saken was in de ottomaanske regeyring van Groutviseer Ahmed Tevfik Pasja. In 1910 tröäken Johnsons türkske oavergroutolden når et Vereynigd Köäningryk. Dår nöäm syn oavergroutvader de achtername van syne britske vrouwe, 'Johnson', an. Andere oavergroutolders warren de suffragette Millicent Fawcett en nen düütsken prins. Stanley Johnson (1940), den vader van Boris, is journalist, skryver, vöärmalig britsk parlementslid en topambtenaar van de europeeske üny. Syn moder, Charlotte Johnson (meydkensname Fawcett) (1942) is künstenaresse en düt portretten en landskappen skilderen. Syne olden güng uut mekander in 1979.
Nå syne skooltyd an de vöärname kostskole Eton College güng Johnson når de Universiteit van Oxford en de Europeeske Skole in Brüssel. Dårnå wör hee journalist. An Oxford was hee by de Bullingdon Club, wår as ouk vöärmålig eyrsten minister David Cameron en Radosław Sikorski by warren. Syne loupbane begün by de Daily Telegraph in 1987. Van 1994 töt 1999 was hee verslaggeaver van EU-saken vöär disse krante. Dårnå was hee höyvdredaktöör by et tydskrivt The Spectator.
Johnson skreav veer autobiografiske böker en twey romans. Vöär de BBC makeden hee ne dokumentäre The dream of Rome (2006), wårin as hee de Europeeske Uny vergelikt med et Romeinske Ryk. Med syne uptreadens in et BBC-programma Have I Got News For You van de BBC, wat hee veer mål presenteerden, wör hee voordan bekender. In 2004 wör hee nomineerd vöär nen BAFTA-prys. In 2006 köm ne biografy oaver em uut.[1]
In april 2016 makeden Johnsons uutgeaver wearldkündig at Johnson solde warken an ne biografy van William Shakespeare under de titel Shakespeare: The Riddle of Genius. Mär in juli van datselvde jår wör ankundigd at et book vöärloupig nit uut solde koamen ümdat Johnson as minister van Butenlandske Saken te druk solde weasen.[2]
Nå syn ministerskap güng Johnson vannys an et wark by de Daily Telegraph, ditmål as kolumnskryver. Vöär syne weakelikse bydrage van 1100 wöörde krigt hee £275.000 (ümmereakend ungeveyr € 300.000) in et jår.[3]
Johnson was trouwd en hevt ses kinder. In september 2018 kundigden hee en syne domålige vrouwe an uut mekander te gån[4]
Vanweage syne geboorte in Ny Jork har Johnson nöäst de britske ouk de amerikaanske nationaliteit. In 2016 deade he dår afstand van.[5]
- ↑ Andrew Gimson: Boris: The Rise of Boris Johnson, Simon and Schuster UK, Londen, 2006, herziene 2e druk 2012, 384 p. ISBN 978-0857207388
- ↑ Brexit, pursued by a bear: Boris Johnson shelves his Shakespeare biography, The Guardian, 23 juli 2016.
- ↑ "Boris Johnson's Daily Telegraph salary revealed to be £275,000", The Guardian, 3 oktober 2018.
- ↑ "Boris Johnson and wife to divorce", BBC News. 7 september 2018
- ↑ Boris Johnson among record number to renounce American citizenship in 2016, 9 februari 2017.