Zunnebloeme

De zunnebloeme (Helianthus annuus) is een tot 3 meter hoge plaante waorvan de zunnebloempitten veur verschillende doeleinden gebruuk wonnen. De plaante beheurt tot de femilie van de composieten en is eenjaorig. 't Bloemenheuf kan wel een diameter tot 30 centimeter hem. De bloeme kan makkelijk ekweek wonnen uut een pitte dee in de tune eplaant kan wonnen. Deur de vlogge greui is dit veural veur kienders antrekkelijk.

Richting

Bleuiende zunnebloemen op een akker wiezen naor 't osen, waor de zunne 's mannensvrog opkump. Onvolwassen zunnebloemen waorvan de knoppe nog neet los is, verteunen heliotropisme: overdag dreit de bloemknoppe op zunnige dagen mee mit de zunne van oost naor west. 's Nachs keert de bloemknoppe weerumme naor de oostelijke stand. Disse dagelijkse beweging wonnen edaon deur een flexibel deel van de stengel onder de bloemknoppe, de pulvinus. Tegen de tied dat de bloeme loskump verstief de pulvinus, in de oostelijke stand. Daordeur wiezen bleuiende zunnebloemen de hele dag naor 't osen, terwiel der heliotropisme al veurbie is.

Oorsprong

Zunnebloemen koemen oorspronkelijk uut Noord- en Zuud-Amerika en bin edomesticeerd rond 1.000 veur Christus. De Inca's vereren de zunnebloemen as beeld van der zunnegod. In 1530 wönnen de zunnebloeme deur zeeluui uut Spanje mee-ebröch naor Europa.

Kweek

Tegensworig besteet der een kweekvorm mit een hangende kop, dee antrekkelijk is veur boeren umdat de bloemen minder beschaodigd wonnen deur voegels en vuul vanuut de luch.

Zunnebloemen wonnen ekweek veur de zunnebloemolie, dee veul gebruuk wonnen in de keuken en as baosis veur verschillende predukken waor plaantaorige olie in verwark wonnen. De zunnebloeme bevat veul onverzaojigen vetzuren en is goed bestand tegen hette en kan daorumme veur 't frituren gebruuk wonnen. In bewarken vorm wonnen de olie oek veur industriële doeleindes gebruuk. Van 't overblievende deel van de uut-epersen pitten wonnen meel van emaak, en wonnen gebruuk as veevoer.