Vrieje Reppubliek Tweante

Uut Wikipedia, de vrye encyklopedy
t Offisjele beeldmoark van de VRT

De Vrieje Reppubliek Tweante (VRT) is ne nit-organiseerde beweaging den vanoet t volk is op erichtet um Tweante ekonomies en kultureel op n heugerder plan te kriegen en doarin meender ofhaankelik van de Hollaandse politiek. De Vrieje Reppebliek Tweante strid tegen ne ofwochende hoolding en preakt doadkracht en zelfbewustwean. Det keump oet de oawertuging det goo verniejing en zikzelf oetbouwen ofhaank van t geleuf in egene kracht en können.

Ontstoan[bewark | bronkode bewarken]

VVD-politieker Johan Remkes zorgden in 2006 zelf ongeweeld vuur t ontstoan van de Vrieje Reppebliek Tweante. As minister van Inlaandse Zaken fleut'e in n kameroawerleg elf Tweantse börgemeaisters terugge. Dee hadden duur börgemeaister Peter den Oudsten van Eanske loaten weten det ze asielzeukers dee't länger as vief joar in Neerlaand warren der nit oet wollen zetten. Det steund Remkes nit an, en hee zea: "An zoksoort tekens he'w niks. Ook nit as ze oet de Vrieje Reppebliek Tweante komt. Dit laand wörd nit noar moties besteurd".

Direks noa Remkes' oetsproake wör n namen "Vrieje Reppebliek Tweante" vaste legd, en ne webstea maakt. Han Pape, heuwdredakteur van De Roskam, is zowat direks doarnoa wekkeliks an t skriewen egoan met n oonderwoarp, eneumd: "De republiek". Hee gef hierin inzicht in Tweantse ontwikkelings, woerbie at'e de Vrieje Reppebliek Tweante as ideaalbeeld gebrok van n egenzinnig en zelfkennend Tweante.

Bestuur en doel[bewark | bronkode bewarken]

Ofskoon t groondbeginsel en de webstea van de VRT wörden an edreagen duur n mediabedrief, is der ginne formele organisasiestruktuur. De gedachte van doadkracht en zelfbewustwean dreg de VRT. Ne leaiding as middelpeunt is doarbie nit eweunsket; doar zollen ze zikzelf met in n boek können bieten. De oetsproaken van de Vrieje Reppebliek Tweante wordt dus nit kontroleerd. Alman den't vuur de VRT woarken wil kan subiet terechte.

De VRT is noadrukkelik gin nasjonalistiese ofskeaidingsbeweaging. "Vie zeent noargens tegen. Vie zeent vuur! Vuur mooie leu, vuur feesten, vuur doadkracht, vuur leu dee't lef hebt, vuur nen goon bak, mear boawenal vuur Tweante!"

Oondernemmens[bewark | bronkode bewarken]

Oonderwiel zeent der al verskeaidene dinge oondernömmen, woerbie de oawereenkomst is det ze de oetgaankspeunten van de Reppebliek met völle skikmakerieje opvatt.

Alman kan n paspoort van de VRT anvroagen. "Vie zett oonze greanzen lös. Nit allene vuur Tweantenoaren en Tukkers! Vie verwelkomt alle Neerlaanders as politieke vluchtelingen, en doar krie'j nog n tweede paspoort bie! Skeai oet met t genöal! Helpt de Reppebliek!

  • n Kafee in Eanske hef zikzelf oet ereupen töt Ambassade van de VRT, met anheurig feest.
  • Leu met härte vuur de VRT köant verskillende kleare van de VRT halen, dee't zoonder weenstbejag bie verskeaidene weenkels an eböaden wordt.
  • Kim Kötter en Enno de Witt presenteert n VRT-kuierprogramma vuur TVEanskeFM en t internet.
  • Betrökkene Tukkers hebt verskeaidene oondernemmens an ekondigt: konserten; boetenlaandse ofdelings; n niejjoarsdoek in t Rutbekke; ne volweardige Universiteat; en mear.

Oetgoande verbeendings[bewark | bronkode bewarken]