Vernis

Uut Wikipedia, de vrye encyklopedy
Nå navigaty springen Nå söken springen
Vioelbouwster die een vioele vernist.

Vernis is een chemische stof die aj aover een varf of materiaol henne striekt um de invloed van 't weer, locht, vocht of schimmels te vermindern. Een deklaoge van vernis is deurzichtig en van nature wat gèlig ekleurd en glaanzend, mar is verkriegber in verscheiden kleuren en mit ziedeglaans of doffe ofwarking. Vernis wördt veurnamelijk gebruukt veur holt waorvan 't de bedoeling is det de narven en kleuren zichtber blieft.

Vernis wördt onder meer emeuken van hars opelöst in alcohol of eulie. Veur 't zölfde doel wördt ok schellak gebruukt. Hars is een taoie, pikkerige substantie ofkomstig van bomen en sommige plaanten; schellak is een stof die ofkomstig is van een loezensoorte. De schellak of hars wördt opelöst in alcohol, efilterd en anemeuken mit beveurbield lienzaodeulie. Vervolgens wördt 't spul ekaokt umme de juuste viscositeit te verkriegen.

Ok vioellak maakt ze vake op basis van hars of schellak mit eulie of alcohol as oplösmiddel. Veule vioelbouwers bint drokker op vernis op basis van eulie as op vernis op basis van alcohol. Eulievernis vluit veule schierder uut en is flexibeler, mar dreugt langzamer. Ok hef 't een zölfherstellend vermogen; as der een grissien of gattien in kump, zal det mit de tied vanzölf (haoste) verdwienen.

Ie hebt ok blakvernis (van black varnish), een groep eulievernissen die donker van kleur bint. Daorin zit as uuthardende stof gien hars, mar bitumen, een mengsel van koolwaterstoffen uut roege eerdeulie.

Bronnen[bewark | bronkode bewarken]

  • Paolo Nanetti (2006), Coatings from A to Z, Hannover: Vincentz Verlag
Nuvola apps ksig.png Dit artikel is eschreven in 't Zuudwest-Drèents.