UEFA Champions League

Uut Wikipedia, de vrye encyklopedy

De UEFA Champions League (oawerzat as Kampioensliga) is een joarliks wedstriedverbaand vuur vootbal. Et wörd op ezat duur de Union of European Football Associations (kortweg UEFA). Metdoon köant eankel Europese vootbalvereniges dee as in öar laand kampioen ewörden zeent. van wat laanden magt ook de een noa beste (en mangs zelfs twee noa beste) klubs metdoon. Op de wearld wörd et ezeen as ene van de meest belangrieke klubwedstrieden. In Europa hef et et heugste anzeen.

De finale van 2012 en 2013 was de meest bekekken UEFA Kampioenskopsfinale töt non too. Doarnöast was et met 360 miljoen tellevisiekiekers et meest bekekken joarlikse sportgeburen van de wearld in 2013.

In 1992 wör de UEFA Champions League invoord as vervanging van de European Champion Club's Cup, of kortweg European Cup. Dit wedstriedverbaand was seend 1955 in gebroekt. Der wör ne groepsfase bie edoan en der konnen meardere clubs oet bepoalde laanden metdoon. Vuur 1992 was et ne rechtlienige ofvalstried, woer as eankeld de kampioen van ieder laand an metdoon kon. In de negentiger joaren wör et format wat oetbreaidt, woerbie as der ne groepsfase in toernooivörm bie köm. Doarduur konden een antal tweede klubs van bepoalde laanden metdoon. De meeste Europese laanden köant eankel öaren kampioen steuren. De stoarkste Europese liga's köant non töt wal veer manskappen steuren en vanof et 2015-16 seizoen wal viewe. Klubs dee as tweedes wordt in de heugste divisie van öar laand, köant dan in de UEFA Europa League metdoon.

In hudigen vörm vaank de UEFA Champions League half augustus an. Doarbie zeent dree ofvalroondes en nen play-off. De 10 manskappen dee as der oet komt, doot met in de groepsfase. Doar zitt al 22 aandere manskappen dee as zik in et vuurten al eplaatst hebt. De 32 manskappen wordt in acht groepen van veer manskappen verdeeld. Zee spölt allemoal twee moal tegen mekoar. De acht winners en acht tweeden goat verdan noar de ofvalfase, met de finalewedstried in mei. Manskappen dee as de UEFA Champions League wint, plaatset zik vuur de UEFA Super Cup en de FIFA Club World Cup.

Real Madrid hef et wedstriedverbaand et vaakste wunnen. Ze hebt den beker elf moal met noar thoes enömmen en det begun al in de eerste vief seizoenen. Spaanse klubs hebt et vaakste wunnen (16x), met doarnoa Engelaand en Italië (beaide 12 moal). De UEFA Champions League is duur 22 verskillende klubs ewunnen, woervan as der 12 um mear as een moal wunnen hebt. Seend as et toernooi van naam en indeling is veraanderd in 1992, hef nog ginenen klub ne vaker as een moal achter mekoar ewunnen. AC Milan wussen as leste klub öaren titel vaste te hoolden tusken 1989 en 1990.

De hudige kampioen is Real Madrid. Zee haalden öaren elfden titel binnen duur Atletico Madrid noa strafsköppe te versloan in 2016.