Tim Douwsma

Tim Douwsma (Drachten, 4 november 1987) is n Nederlaandse zanger. In 2007 nam hi'j diel an de talentenjacht So You Wanna Be a Popstar op de tillevisiezender SBS 6 en aendigde op t viefde plak.

Biografie

Tim Douwsma wordde op 4 november 1987 geboren in t Friese Drachten. Nao de middelbere skoele studeerde Douwsma an t CIOS, n sportopleiding. Al gauw stopte hi'j mit de opleiding om him volledig te richten op n zang- en akteerloopbaene. Daornaost dee hi'j modellewark.

An t aende van 2007 nam hi'j zien aldereerste liedtien Wil je bij me blijven slapen op. Dit liedtien ston in de Single Top 100 op n 18e plak as hoogste notering.

Sund 20 febrewaori 2008 is hi'j overstapt naor Roadstar Agency. An t aende van april 2009 kwam zien twiede liedtien Ga uut, skreven deur Joost Griffioen en Ray Klaassen van The Rocketeers.

An t aende van 2009 had Tim n kleine rolle in de film "De Hel van '63", regisseerd deur Steven de Jong. Hi'j speult hierin de rolle van Melle.

Begin 2010 kwam zien ni'jste liedtien Je bent de hemel uut. Dit nommer is n Nederlaandse bewarking van t Spaonstaelige nommer Yo No Se Manana van de Nikaraguaanse zanger Luis Enrique. De klip hiervan is opneumen in Brugge en t nommer was bi'j sterren.nl de hittip van de weke. In febrewaori van dat jaor presenteerde hi'j de eerste oflevering van 'Tim op Tilt' op Sterren.nl. Dat was tot t opheffen van de zender in september 2012 te zien. An t aende van 2010 was hi'j gastheer van de Sterren.nl Awards, tegere mit Monique Smit en Kees Tol. Daornaost presenteert Tim tegenswoordig t tv-programma Karaoke Kids op Z@pp. Douwsma speulde himzels in Zaak Zappendael.

In jannewaori 2011 dee Tim mit an Sterren Dansen op het IJs. Hi'j aendigde as laeste. t Ni'je liedtien Bij jou van Douwsma is de hiele maond desember te heuren in n reklame veur aepeneuteprakke, as veurpruvien van zien ankommende debuutalbum begin veurjaor 2012. Op 5 jannewaori 2012 maekte Radio 2 bekend dat Douwsma ien van de zes dielnemers is die keuzen is uut 491 opgeven liedties veur t Nasionaol Songfestival 2012. In de finaole nam hi'j t in t eerste duel op tegen Pearl Jozefzoon. Hier kreeg hi'j mit zien nommer Undercover Lover niet genoeg stemmen en wordde in de eerste ronde uutskaekeld. t Nommer kwam in de weke nao t Nasionaol Songfestival binnen in de Itunes-hitlieste op plak 79, waordeur van n beskeiden sukses spreuken kan worden.

t Ston ien weke op plak 95 in de Single Top 100. Op 6 desember 2012 wordde bekend dat Douwsma tegere mit Smit n album opnemt en tegere in 2013 in Nederlaand en België toeren gaon^[1].In 2014 is hi'j de ni'je presentator van AVRO Junior Dance en geft hi'j de punten veur Nederlaand in de finaole van t Eurovisiesongfestival 2014.

Diskografie

Albums

Titel	Daotum uutebröcht	Daotum van binnenkomst	Hoogste posisie	Antal weken	Opmarkingen
Albums mit hitnoteringen in de Nederlaandse Album Top 100
Grenzeloos	2013	01-06-2013	7	12	mit Monique Smit

Losse liedties

Titel	Daotum uutebröcht	Daotum van binnenkomst	Hoogste posisie	Antal weken	Opmarkingen
Enkelspeulplaoten mit hitnoteringen in de Nederlaandse Top 40
Wil je bij me blijven slapen	04-01-2008	-			nr. 18 in de Single Top 100
Je bent de hemel	15-01-2010	-			nr. 21 in de Single Top 100
Allebei	08-06-2010	-			nr. 42 in de Single Top 100
Winter voor twee	18-12-2010	-			nr. 13 in de Single Top 100
Eén zomeravond met jou	15-04-2011	-			mit Monique Smit / nr. 13 in de Single Top 100
Undercover lover	26-02-2012	-			nr. 95 in de Single Top 100
Langzaam wordt het zomer	2013	-			mit Monique Smit / Nr. 7 in de Single Top 100
Koningin van alle mensen	16-04-2013	27-04-2013	6	3	as onderdiel van RTL Boulevard United / nr. 1 in de Single Top 100 / Goold
Even niet hier	2013	-			met Monique Smit / nr. 76 in de Single Top 100
Dromen van elkaar	2013	-			met Monique Smit / nr. 93 in de Single Top 100