The X-Files

Uut Wikipedia, de vrye encyklopedy

The X-Files is een Amerikaanske science fiction drama televisyryge, bedached döär Chris Carter. Et hevt op TV espöäled van 1993 töt 2002 up de sender Fox. Med et loupen van de ryge hevt der een bioskoopfilm ewesd en later, toon as de ryge neet meyr dräien nå 9 seisonen, hevt der noch een film ewesd. In 2016 bint sy wear begünnet med et dräien van nye seisonen. Wårvan et 11. seisoon in january 2018 begünden. In de jåren '90 van de vöärige eywe was de ryge slim bekend en wördden wekkeliks döär milionen bekekken.

Et dräit ümme de FBI-agenten Fox Mulder en Dana Scully den de X-Files undersöket. De X-Files is een ofdealing binnen de FBI, dee geyt oaver neet-up-elöste en vrümde en unverklårbare saken. Dana Scully is een weatenskoppelike vrouwe, dee höyr vrågen hevt by et unverklårbare en wil et ait med verstand bekyken. Fox Mulder wördden up de FBI-skole 'Spooky Mulder' enömed, ümdat hee jüüste gelövt in dinge as magy, geysten, butenaerdse weasens en so meyr.

De ryge kün y in tweyen updealen: 'monster of the week'-ofleaverings , wat lösstånde ofleaverings bint med vrümde saken. Én de roude lyne in de ryge, den geyt oaver butenaerdse weasens en de geheime regearing dee med ear samenwarkt. In disse roude lyne wörd y ouk wyser oaver Mulder en Scully's persoonlike leaven en düt et ouk vlink ter hoape loupen.

Dit artikel is eskreaven in et sallandsk.