Stellet Licht

Oet Wikipedie, de vraaie enzyklopedie
Gao naor: navigasie, zeuk

Stellet Licht (Stil locht; Spaans: Luz silenciosa) is een film uut 2007, eschreven en eregisseerd deur de Mexicaanse filmmaker Carlos Reygadas en efilmd in Cuauhtémoc, Chihuahua, een stad in 't noorden van Mexico.

't Verhaal speult in een Mennonietengemienschop en giet oaver Johan (Cornelio Wall), een etrouwde man die een affaire hef mit Marianne (Maria Pankratz). Hi'j vuult det zien vrouwe Esther (Miriam Toews) niet de waore veur hum is en deelt zien stried mit zien beste vrund, mit zien va en uutendelijk mit zien vrouwe. De vredelievende en hechte aord van de religieuze gemienschop drif de acties en reacties van de betrökken personen. De dialoog is in 't Plautdietsch, de spraoke van de mieste Mennonieten.

Reygadas zien filmwark stiet bekend um de lange sequenties - beveurbield een oplochtende steernhemel, of de femilie van Johan die an taofel zit te bidden - en 't gebruuk van amateurspeulers. De film is een internationaole coproductie van productiehuzen in Mexico, Fraankriek en Nederlaand en hef een köppel priezen ewunnen, waoronder de jurypries van 't Filmfestival van Cannes (2007).

De hoofdrolspeulers geeft mit heur ofkumst een diel van de migratiegeschiedenis van de Mennonieten uut Ruslaand weer: Miriam Toews woont in Canada, daoras op 't end van de 19e eeuw flink wat Mennonieten uut 't doemaolige Zuud-Ruslaand (now Oekraïne) hen bint etrökken. Een diel daorvan stichtten vanof de jaoren twintig van de 20e eeuw ni'je kelonies in Mexico, daoras Cornelio Wall woont. De Mennonieten die töt an de Tweide Wereldoorlog in de Sovjetunie ebleven bint, bint daornao in Duutslaand terechte komen - daoronder Maria Pankratz, geboren in Kazachstan en now woonachtig in Espelkamp, Noordrien-Westfaolen.

Uutgaonde verwiezings[bewark | bronkode bewarken]