Roetenvene

Ligging van 't Roetenvene (rood) in 't Leusenerveld (rose) binnen de gemiente Dalsen (gries)

't Roetenvene (Nederlaands: Ruitenveen) is een buurtschop in 't zuudwestelijke butengebied van 't dörp Neilusen in de gemiente Dalsen, in de Nederlaandse pervincie Aoveriessel. In 't Roetenvene woont zo'n 470 mèensen in verspreide huzen. 't Grotere gebied waor 't Roetenvene in lig wördt 't Leusenerveld enuumd.

Wegen en ligging

De mieste bebouwing lig an de weg Ruitenveen, die parallel löp an 't daoronder elegen Westeinde (de N758). De weg Ruitenveen stiet an 't westelijke end haoks op de Staphorsterweg en an 't oostelijke end op de Jagtlusterallee. Ok haoks op de weg Ruitenveen, deur de midden, löp de Petersweg. An dizze weg lig basisschoele Het kompas.

Onder 't Roetenvene lig 't Dalserveld; ten noorden lig de Neiluseger buurtschop De Meele. Aj vanof 't Roetenvene 't Westeinde naor 't westen toe volgt, koj uuteindelijk aover 't spoortraject Zwolle-Möppelt en deur 't Zwolse bedrieventerrein de Hessenpoorte.

Laandschop en bebouwing

't Roetenvene wördt ekenmarkt deur bossies, holtwallen, holtsingels en lanen. Der is veurnamelijk lintbebouwing mit boerderijen in een dubbele ontginningsasse (an de wegen Westeinde en Ruitenveen). De boerderijen bint heufdzakelijk van 't hallenhuustype, mit lege geuten en zadeldaken mit wolfsenden.

Geschiedenis

Ontstaon

Van oorsprong is 't Roetenvene een agrarische nederzetting. De ontstaonsgeschiedenis is dezölfde as die van 't dörp Neilusen: de bewoning kwaamp mit de ontginning van 't gebied deur de Luessener Compagnie. Dizze compagnie wördden in 1631 opericht deur inwoners van Zwolle, Kampen en Lusen ('t tegenwoordige Oldlusen) um de veengronden te vervenen en de moerassen te ontginnen. Rond 1635 wördden der op de plaatse van 't hudige Westeinde een ofwateringskenaal egraven det uutmondde op de Vechte. Hierlanges ontstunden weilaanden en akkerlaanden veur boekweite mit elzen en essen langs de raanden. Op de nog onontgonnen woeste gronden graozden vernamelijk schaopen; in die tied waren der veul schaopskooien.

Name

In 17de-ieuwse inschrievingen in 't deupboek van Neilusen koomt de schriefwiezen '(Nieuwe) Ruijtenveen', 'Routenveen' en 'Ruitenveen' veur. De name is ofeleid van de buurtschop De Ruten, die wiederop naor 't noordwesten lig, tussen de Stienwetering en de A28. Olde vermeldingen van dit leste gebied bint 'die Rute' (1381-1383), 'De Ruete' (1434), 'De Ruijte' (1456), 'De Rute' (1459) en 'De Route' (1648). Dizze name lek te komen van 't woord roet, oftewal onkruud.

Verkavelings

't Laandbouwgebied wördden algedurig uutebreid en der ontstunden smalle kavels en diepe laanden. Deur de bevolkingsgrui en de ontginning kwaamp der benoorden 't hudige Westeinde een tweede woonasse. 't Zogenaamde achterpad, nou de weg Ruitenveen, löp nog aordig grillig. Veurnamelijk deur de verkaveling in de jaoren vieftig van de twintigste ieuw ontstund der achter 't Westeinde en Roetenvene een laandbouwgebied mit een aoverwegend open en grootschalig kerakter. Bij de leste ruilverkaveling in 't gebied wördden der verscheiden maotriegels etröffen um de beste productie-umstaandigheden te kriegen veur de duurzame laandbouw.

Mit de anleg van bossies en arf- en perceelbeplaanting perbeert ze 't laandschop weer in de historische staot terogge te brengen.

Buurtfeesten en -bijienkomsten

't Roetenvene hef een in 1985 operichte buurtverieniging. De buurtschop organiseert alle jaoren een buurtfeest en een bowlingaovend. Um de twee jaor, as der een WK of EK voetbal espeuld wördt deur 't Nederlaands elftal, kump 't gros van de bewoners in een tente bijien um de wedstrieden van 't Nederlaands elftal te bekieken.

Beriekberheid

't Roetenvene hef een eigen bushalte, waor regioliende 29 (Zwolle - Roetenvene - Neilusen - De Vaort - De Vaort Magnolia - Slagharen (- Coevern)) en scholierenliende 649 dienst doet. Aoverdag deur de weke rid de 29 een halfuurdienst. 's Weekends en 's aovends nao 19:00 rid de 29 een uurdienst.

Uutgaonde verwiezings

• Webstee van Buurtvereniging Ruitenveen

Verwiezings

Dit stok is eschreven in 't Zuudwest-Drèents.