Rheebruggen (havezate)

De havezate Rheebruggen (achterkaante) deur Hendrik Spilman in 1737

Rheebruggen (ok R(h)obrugge) was een havezate tussen de Drèentse plaatsen Aansen en Uffelte in 't Deverderdingspel, net buten de heerlijkheid Rune.

Rheebruggen was ieuwenlaank in 't bezit van leden van de femilie Van den Clooster. De name Rheebruggen wördden waorschienlijk in 1382 veur 't eerste vermeld. In 1437 hef Johan van den Clooster 't laandgoed in zien bezit ekregen. Wanneer of 't huus Rheebruggen percies op 't laandgoed ebouwd wördden weet ze niet. In 1560 wördden Roelof van den Clooster tot Rheebruggen enuumd as ette in 't Deverderdingspel. 't Huus Rheebruggen is dan ok véur 1560 dalezet. In 1616 is 't huus erkend as havezate. Rheebruggen was nog aorig bescheiden van umvaank. D'r waren vief kamers en vief aandere roemtes.

Töt 1789 is 't huus mit de laanderi'jen in bezit eblèven van de Van den Cloosters. Daornao kwaamp 't deur verarving in 't bezit van de femilie Van Holthe. De börgemeister van Dwingel, Aalt Willem van Holthe tot Oldengaerde, arfden Rheebruggen in 1824. Dizze Drèentse politicus en holthandelaor was al eigenaor van de havezate Oldengaerde in Dwingel. In 1830 wus e ok de havezate Batinge in haanden te kriegen. Krek as Batinge leut hi'j ok Rheebruggen slopen. In de stee d'rvan kwaamp rond 1835 een boerderi'je. 't Laandgoed Rheebruggen is now in 't bezit van de Stichting Het Drentse Landschap.

De Ogeveinse schriever Albert Steenbergen (1814-1900) schreef oaver Rheebruggen in een gedicht De beuze jaeger oaver de Sunterklaoslegende, die as e in de buurte van Dwingel lokaliseerden vanwegen de Sunt-Nicolaoskarke daor.

Het gedicht begunt zo:

Reebroggens Borgt was offebraand;
Drij kiender dweelden um deur 't laand;
Zij hadden honger, waeren kold
En zwörven krietend um in 't wold

En eindigt zo:

De kiender raekten hoog in staand
't Oldst wörde Drost van Drentelaand;

Het tweede, ook 'n grootmachteg heer,
Bouwde op het huus Reebroggen weer.
Het darde wörde 'n Vorst der Kark.
Looft God de Heer veur 't wonderwark.

Bron

• Jaap Bos (en aandern) (1989), Huizen van stand: geschiedenis van de Drentse havezaten en andere herenhuizen en hun bewoners. Möppelt: Boom