Praag
Praag (Sprek oet [praːx], in t Tsjechies: Praha) is de heuwdstad van Tsjechië. t Is doar ook de grötste stad. Dr wont ongevear 1,3 miljoen leu in de stad zelf, en met de boetngebeedn dr bie ereknd kom iej an 2,3 miljoen leu. t Ligt in t noord-westn van Tsjechië an de Vltavarivier. De stad vaalt oonder n gemoatigd zeeklimaat, met hete zommers en friske weenters. Praag besteet al 1100 joar.
Praag hef aait al n politiek, kultureel en ekonomies sentrum van Europa west, en vuural van Centraal Europa. Praag was gedoernde de Gotiek en Renaissance de vaste wonstea van twee Rooms-Duutse keaizers en doarmet dus ook de heuwdstad van t Helige Roomske Riek. t Was later ne belangrieke stad in de Habsburgmonarchie en t Austro-Hongaarse Riek. Noa n Eersten Wearldoorlog wör t de heuwdstad van Tsjechoslowakije. De stad har nen belangriekn plek in de Reformasie, n Dartigjoarigen Oorlog, in de beaide wearldoorleuge en in de noa-oorlogse Kommunistiese tied.
In Praag zeent nen onmeundigen hoop toeristiese publiekstrekkers bewoard ebleewn, zo as t Praags Kasteel, de Koarelsbrugge, t Oolde Stadsplein, t Jöds Kwartier, de Lennonmure en Petřínheuwel. Vanof 1992 steet t grote historiese sentrum van Praag op de Wearldoarfgoodlieste van UNESCO.
Praag hef mear as tien grote museums, nöast ontelboare theaters, galleriejn, bioskoopn, en aandere historiese tentoonstelliges. Praag hef n groot anbod van openboare en privaatskooln, woeroonder de wied en zied bekeande Koarelsuniversiteat. De rieke geskiedenisse van Praag trekt völle toeristn; in 2009 mear as 4,1 miljoen.
Praag wörd wal es an eduudt as ne wearldstad. Praag hef n modern openboar vervoorstelsel. Doarnöast is Praag good te bereikn met n auto, n trein of t vleegtuug.
