Petrus

De apostel Petrus (Grieks: Πέτρος, Petros oftwel 'Rots'; Aremees: Cephas; vernederlaands Sint-Pieter); ok Simon Petrus enuumd; (Galilea, geboortedaotum onbekend - Rome, ca. 64) is 'n mannegie uut 't Ni'je Testement en iene van de twaalf leerlings van Jezua van Nazaret. Hi'j is veur kathelieken n eersten paus en veur orthedoksen de eersten patriarch. In kunst en ikonografie is Petrus aait te herkennen an zien grieze baord en de slöttels van n hemel, wukke 't Petrusambt simboliseert. Aandere spullegies bint 'n kruus aansumme, vissersnet en 'n hane.

leevn

Sjimon bar Jona ('Simon, zoon van Jona'), zo as Petrus orsprönklik nuumd wördden, was 'n jeudse visser an 't Meer van Tiberias. Hi'j leefden saam met zien breur Andreas van de visvangst. Simon har saam met Andreas 'n normaal leventie. Toe Jezua van Nazareth op zeuk göng naor leerlings, vunden hi'j al rap Andreas. Voolgns de biebel spraken Jezua töt eur beiden, op 't meer: "Achter mi'j an komm!, 'k zalle oeluu op meansen laotn vissn."

Voolgns Lukas antwoordden Petrus hum: "Gao toch hen, Heer, dat bin 'k nie weerd!"

Jezua wös Simon rap te overtuugen, en disse vertrouwden Jezus en leut zien vissersbote lingn. Jezua besleut Simon vanof dan Kefas te nuumen, wat Aremees veur rots is. Zien Griekse name Πέτρος (Petros) is de mannlike vörme van 't vrowlike πέτρα (petra) dat eemiens rots betekkent. Hoewel Simon zich nie te pas vuulden met zien roeping, zol e later – veural in n kathelieke traditie – n eerste van apostels wörden enuumd en n eersten plasevervanger van Kristus wörden.

Dit artikel is eskreaven in et sallandske dialekt van 't Vechtdal, in de Algemene Nedersaksiese Schriefwieze.