Papyr

Verskillende papyrprodukteː en book, wc-papyr, karton, lynenpapyr un ne eierdöse

Papyr is en dün un büügsaam materiaal, wat vöärnamelik gebruked wördt um up to skryven, skilderen, teykenen, drükken, dinge med to verpakken of uppervlakdes med to puutsen. Et wördt med de hande of in en fabrik emaked döär cellulose veasels uut holt, olde todden, grössen of andere planten to vermålen, med water an to lengen un et dan döär en skarm of slat to halen. Et water lekket der döärhen un de veasels verdeylt sik lykmåtig oaver et skarm. Dårnå wördt et anedrukked med en swår gewechte un to dröygen elegd.

Papyr wör van oorsprung med de hande maked. Rechtevoord kan et med groute machines, wår mangs lappen van 10 meter breyd by tweydusend meter de minute uutrullet.

Papyr wördt vöär heyl wat dinge gebrukedː drükkerye, skilderen, grafisk untwerp, reklamewark, verpakkingen, versyring, skryven un skounemaken. Wyders kan et denen as filterpapyr, behang, laminaat vöär warkbanken, geld, un in verskeidene industriäle processen un in den bouw.

Et proces van papyrmaken wör untdekked in Oustasie, meyst wårskynlik in China. Den eyrsten wat et beskreav was den hovmeister Cai Lun van de Han-dynasty. Toch stammet de öldste vündste van papyr al uut de 2. eywe vöär Kristus uut China. Et meyste moderne papyr-uut-pulp wördt emaked in China, med de Vereynigde Ståten as tweyde grötste producent.