Ossenbrugge

Uut Wikipedia, de vrye encyklopedy
Ossenbrugge op de kaarte van Nedersaksen

Ossenbrugge (Hoogduuts: Osnabrück) is ne plaatse in de boondsstoat Niedersachsen in Duutslaand. De plaatse ligt kort bie de grenze met Westfalen, en vrogger heuren ze ok bi'j Westfalen, wat in de kultuur nog te zeen is. Et is noa Hannover, Brunswiek en Oldenborg de grötste stad van de boondsstoat Niedersachsen, met 164.374 inwonners (2017). Doarvan zeent 28.000 studeanten, wat 14% van de hele bevolking is. Ossenbrugge is ne kreisfreie stad en vaalt dus besteurlik rechtstreeks oonder de boondsstoat.

Et is ene van de twee steaden woer as in 1648 de Vreade van Westfalen slötten wör. Doarmet stopten den 30-joarigen oorlog. In den Tweeden Wearldoorlog wör de oolde binnenstad kapot esmetten met bommen. Et roadhoes woer as de Vreade van Westfalen oonderskrewen wör, steet nog oawereande.

Verleden[bewark | bronkode bewarken]

Ossenbrugge hef seend 780 ne Rooms-Katholieke bisskopszetel. Bisdom Ossenbrugge was et eerste Saksiese bisdom wat Koarel den Groten stichten. roondum de bisskopskaarke wörden heanig an mear huze bouwd. In 1147 wör et vuur et eerste ne stad eneumd. 1157 meug Ossenbrugge zik van keaizer Frederik Barbarossa verstaarken met stadsmuren. Um mear haandel te kriegen, stichten Ossenbrugge met Meunster, Minden en Herford in 1246 de Laadbaarger Maarktboond. Dit was de vuurloper van de Westfaalse Steadenboond, dee in et 14de joarhoonderd bie de Haanze kömmen.

Tusken 1643 en 1648 wörd der in Ossenbrugge en Meunster ekuierd oawer de Vreade van Westfalen. Hiermet kömmen den Dartigjöarigen en den Tachtigjoarigen Oorlog an den eande. Et vreadesverboond har as vuurwearde det nen regearenden preens-bisskop vanof toen et ene moal Rooms en et aandere moal Protestaants wean mos. Den Protestaantsen bisskop wör dan beneumd töt Hartog van Brunswiek-Luneborg. Et preensbisdom wör in 1803 op ehewen. In de Fraanske tied köm Ossenbrugge oonder besteur van Hannower. In 1866 wör et doarduur Prusies en in 1871 Duuts.