Neerslag

Uut Wikipedia, de vrye encyklopedy
De gemiddelde jaorlikse neerslag in et jaor per laand

Neerslag is een verzaemeling waeterdielties die uut een wolk of een groep wolken valen en et eerdoppervlak berieken. De waeterdielties kunnen zowel vaste as vluiber wezen en kristalvormig of amorf, krekker: regen, haegel, mist, korrelhaegel, iesregen en sni'j. Neerslag is meugelik deurdat waeter verdaampt in 'e daampkring, omme vervolgens te kondenseren in wolken. Et is zodoende een belangriek onderdiel van 'e waeterkringloop.

De neerslag op eerde is gemiddeld zo'n 1130 mm et jaor: 1270 boven oceanen en 800 boven laand. Plaeselik is der slim vule verschil, van 50 tot 500 mm et jaor in woestijnen tot meer as 10.000 mm et jaor in sommige tropische gebieden. Alle jaoren vaalt der zo'n 577.000 km³ neerslag, waorvan zo'n twintig percent boven laand. Angezien et volume waeter in 'e daampkring 12.900 km³ is – mor 0,001% van de hydrosfeer, de totale waeterveurraod op eerde – wodt et waeter daor alle acht daegen vervast, ongeveer 45 maol in et jaor.

De hoeveulheid waeter in de daampkring is beparkt en varieert tussen de 0,001 en de 5 percent. Et is aans wel van grote invloed op et weer en de energiebalaans. De hoeveulheid nemp of mit 'e heugte, zodaj haoste al et waeter in de daampkring in de troposfeer treffen.

Neerslag is ok et belangriekste verwiederingsmechanisme van lochtversmeriging. Zo'n 80-90% daorvan vient plaese via natte verwiedering. Wieder mak neerslag diel uut van et global electrical circuit, krekker de atmosferische elektriciteit. Via neerslag is d'r een laedingstransport richting eerde van zo'n +90 coulomb de km² et jaor, naost de mooiweerstroom, blaksem en puntontlaodings.

Dit stok is eschreven in et Stellingwarfs van de Kop van Overiessel.