Nedersaksische podcasts

Nedersaksische podcasts, of platcasts, bint podcasts die diels of kats in 't Nedersaksisch ebracht wördt, en/of heur op een structurele maniere bezigholdt mit dizze taal. Een Nedersaksischtalige podcast kan in principe aover alle onderwarpen onder de zunne gaon.

Lieste van Nedersaksische podcasts[bewark | bronkode bewarken]

De Wearldspråke Podcast is een op 18 juni 2018 begunde podcast, te beluustern via verscheiden platforms waoronder YouTube en Spotify. De maker is Martin ter Denge uut Riessen, Aoveriessel. De podcast, in 't Riessens eprissenteerd, giet aover de Nedersaksische taal zölf. De insteek is det die serieus eneumen mut wörden as een volweerdige, moderne taal waor toekomst in kan zitten as de gebrukers dervan det zölf wilt. Bezundere andacht is der veur broggenbouwerije tussen sprekers in Nederlaand en sprekers in Duutslaand. Mangs prissenteert Ter Denge de podcast allennig, mangs is der een gast. Miestal is Wearldspråke puur audio, een enkele keer kriej der bield bij. Per december 2020 bint der 35 ofleverings.

WATATA is een op 5 april 2020 estarte audiopodcast op Spotify, begund um luusteraars Twèentstalige dieverdaotsie te brengen in coronatied, veural as ze beveurbield wegens leeftied an huus ebunden bint. De prissentatoren bint Martin ter Denge en Gerbert Voortman uut Riessen. De titel van de show beduudt Wa's dat dan, de reactie die volgens de makers veul luusteraars zult hebben wegens de naodrok op geïmproviseerde kurendrieverije daor aj beter gien diepere betiekenis achter kunt zuken. In de oflevering van 14 febrewaori 2021 zee Ter Denge det, allewal ze in eerste instaansie verwachtten oldere luusteraars te trekken, de mieste luusteraars tussen de 20 en 30 jaor liekt te wezen.

De Grunneger Podcast is in september 2020 begund deur Ingeborg Nienhuis en is mit op Spotify beschikber. Nienhuis is schriefster en is sinds 2016 streektaalfunctionaoris bij 't Bureau Groninger Taal en Cultuur.

Praot Drents met mij is een Drèentstalige podcast die op 3 meert 2021 begund is. In de podcast prat Renate Snoeijing, directeur van 't Huus van de Taol, mit Drèenten aover wat 't Drèents veur heur betiekent. De podcast wördt in de maande emeuken deur 't Huus van de Taol en RTV Drenthe. De eerste oflevering was mit William Bossong, bassist van de rockgroep Mooi Wark.

De Nedersaksen is een op 21 september 2021 begunde podcast waorin Hendrik Jan Bökkers en Albert Bartelds 't mit menare en mit gasten hebt aover Nedersaksische taal, cultuur en geschiedenis. Muziek nemp een centraole plekke in. De riege is een productie van Hedon Productiehuis in samenwarking mit de Iesseakkedemie en wördt uutebracht deur Topcast Media.

Plattfunk – Der Podcast auf Hoch- und Plattdeutsch is een op 24 febrewaori 2020 estarte Platduutse audiopodcast op YouTube, eprissenteerd deur Thorsten Börnsen en Nikos Saul. De podcast giet aover allerhaande onderwarpen. Alle keren prat iene van de beiden Platduuts en de aander Hoogduuts. Per 3 december 2020 bint der negen ofleverings.

De Plautdietsch PlautCast is een op YouTube te bekieken videopodcast in 't Plautdietsch, een vörm van Nedersaksisch die veural in Noord-, Midden- en Zuud-Amerika espreuken wördt deur lu van Russisch-Mennonitische ofkomst. De prissentatoren bint twee mansluden, Ken en Vern, uut Winnipeg, Canada. Per 28 april 2020 hebt ze 76 ofleverings emeuken.

De riegen Schölers leest Platt en SPRAAK! wördt deur de Schleswig-Holsteinischer Heimatbund anebeuden op audio-uutzeiingsplatform Soundcloud. De podcast SPRAAK!, begünd op 9 september 2020, dreit um Platduutse cultuur in Sleeswiek-Holstien en wördt prissenteerd deur Jan Graf.

Onder de titel Platt Land Kind zet MissLawlHey, een jonge vrouwe uut Oostfrieslaand, körte humoristische filmpies in 't Platduuts van Oostfrieslaand op YouTube. Vake behandelt ze plattelaandsonderwarpen of gef ze uutleg aover 't Platduuts. De Platduutstalige filmpies wördt sinds 2015 anebeuden.

Uutgaonde verwiezings[bewark | bronkode bewarken]

Dit stok is eschreven in 't Zuudwest-Drèents.