Nationaol Park De Weerribben

Et Nationaol Park De Weerribben is een 35 km² groot park in Nederlaand, dat grotendiels in hanen is van Staotsbosbeheer. Et nationaole park is op 17 jannewaori 2007 uutbreided mit et gebied De Wieden dat in et zuden d'r van leit en grotendiels in hanen is van Netuurmonementen. Tegere mit park De Wieden vormen ze et Nationaole Park Weerribben-Wieden i.o. dat 100 km² groot is. Tegere bin ze ien van de belangriekste moerasgebieden van Europa. De planning is dat d'r nao twie jaor de definitieve instelling van et park volgt. Dit nationaole park leit in de Overiesselse gemiente Stienwiekerlaand.

Geschiedenis

Tot 1920 wodde d'r in dit gebied turf wunnen. Naodat et turf steuken was, mos dit dreugen op de zogenaemde "ribben", smalle stroken laand die mit hier speciaol veur anlegd wodden (legakkers). Somstieden sleugen disse ribben weg bi'j slecht weer, zo ontstonnen de Wieden. Omdat et meerste turf steuken was gongen ze daornao over op de winning van riet. Doe in 1919 een gemaol bouwd wodde begun een perces van verdreuging. Dit perces wodde verstarkt deur de inpooldering van de Noordoostpoolder.

Beheer

As d'r gien beheer is, verdwienen et rietlaand en et hoogvene deur verlaanding en wodden de weerribben een groot moerasbos. Mit et mi'jen van riet en et uutbaggeren van sloden blift de situaosie etzelde. D'r bin slim veul meulens in de weerribben; waor ze vrogger et waeter mit votpompten, helpen ze now om et terrein nat te holen.

Dieren

Biezunder is de purperreigerklonie. Ok hej' d'r de zwarte stern, rietdompe en moerasvoegels as karekiet, snor, rietzanger en gele gouw. Zoogdieren as de ree, vos en Europese otter kuj' hier ok vienen. In et gebied komt ok de grote vuurvlinder veur, in een speciaole ondersoorte Batava en tal van aandere vlinders. Veur libellen is et waeterrieke gebied mit zien riet ok slim belangriek: De vrogge, Broene en Grune glaezemaeker, Grote keizerlibel, Viervlekke en verschillende soorten heidelibellen.

De otter

In 2002 is begunnen mit de herintroduktie van de otter. D'r bin now een antal dieren die heur territorium in de Weerribben hebben. Een antal dieren wodden ok buten de Weerribben zien.

De mooiste plek van Nederland

Op 27 november 2004 wodde in de finaleuutzending van et NCRV-tillevisiepergramme De mooiste plek van Nederland et netuurgebied De Weerribben tot winner keuzen. Et Friese Moddergat en et Grunningse Lauwersmeer wodden twiede en dadde.

Galleri'je

Ekenomisch gebruuk van et gebied

riet
toeristen
entekooien

Uutgaonde verwiezings