Madonna (zangeres)

Foto van Madonna uut 2008

Madonna Louise Veronica Ritchie Ciccone, geboren op 16 augustus 1958 bie Detroit) is n Amerikoanse popzangeres, danseres, schriefster, actrice en songwriter. Ze wordt ook the queen of pop nuimd, dat gain onterrechte bienoam is. Zie domineert al zo'n 35 joar de hitliesten en is de bestverkopende vraauwleke artiest aller tieden.

Biogroafie

Vrouge joaren

In 1958 wuir Madonna in Bay City, n ploatske bie Michigan's heufdstad Detroit geboren as oldste van 6 kinder. Heur pa, Sylvio (of Tony) Ciccone, is Italioans en heur moe, Madonna Ciccone-Fortin, was van Frans-Kanadees.

Madonna gruide op in Rochester, n veurstad van Detroit. In 1963, overlaid heur 30-joarege mouder aan kanker. Madonna was dou nog mor 5 joaren old. Heur voader hertraauwde mit de hoesholdster, Joan Gustafson. Madonna begriept heur voader nait. De dood van heur moe en de misverstanden tussen heur en heur voader hebben n enorme inpact had op heur. Dit is ook trugge te vinden in laidjes as Oh father, Keep it together, Inside of me en Mother and father dij zai loater schrieven zol.

As kind volgde Madonna piano- en balletlessen en op school dee zai aktief mit aan de artistieke aktiviteiten. Noa de middelboare school kreeg zai n studiebeurs veur de Universiteit van Michigan. Noa twij joar (1978) verluit zai de universiteit om mit 35 dollar in n taxi te stappen noar Times Square in New York.

Begun van heur affeer

Doar begunt Madonna's professionele daans- en akteeraffeer. Zie speult in n körte film en speelt in verschillende punk-bandjes. As zai de bruiers Warner tegen komt, kriegt zai n ploatenkontrakt en moakt heur eerste album "Madonna". Singles van dit album waren Everybody, Holiday, Borderline, Burning up en Lucky Star. Veuraal Holiday was n grode hit dat tegenswoordeg nog aal ain van Madonna's persoonleke favorieten is. t Imago van Madonna was "stroatwicht" en "boy toy". Dit huil zai ook bie de single Like a Virgin aan. Dizze single en album mit dezulfde noam worden voak zain as heur grode deurbroak. As aine zegt: "Like a virgin, touched for the very first time" den wait elk dat t om Madonna gait.

Noa t oetbrengen van de single Like a Virgin, kwam Madonna mit heur volgende grode hit "Material Girl", n titel dij zai tot nau tou nog aal mit zoch mit dragt. De video was Madonna, in tegenstellen tot de veurege video's, in n wereld van Hollywood, style, sieroaden, körtom "the material world". De video was inspireerd deur de film Men want mit Marilyn Monroe. Op de set van Material Girl komt zai akteur Sean Penn tegen, woar Madonna loater dat joar heur joa-woord aan geft.

In datzulfde joar speulde Madonna in de film Desperately seeking susan, woarvan zai de soundtrack meuk Into the groove. Dit wuir ook ain van heur grootste hits ooit. Dizze kwam op de heroetgoave van Like a Virgin. Wieder kwamen de singles Dress you up en angel nog oet van t Like a Virgin album. Noa dij singles gong Madonna op tour, de Virgin tour. Dit was heur eerste tournee mit nog wat simpele optredens.

Noa dizze tour en n aandere film, mit twij grode soundtrack hits Crazy for you en Gambler, begon zai in 1986 mit t "True Blue Album" n serieuze affeer as zangeres. Bienoa alle singles wuiren succesvol. Versies as Live To Tell, La Isla Bonita, Papa Don't Preach en Open Your Heart worden deur elk oet dij tied wel heugd. Papa Don't Preach zörgde veur de eerste ophef rond heur. t Laidje gait over tienerzwangerschop, n onderwaarp dat gevuileg lag in dij tied.

In 1987 speult Madonna in de film Who's That Girl, woarvan zai ook n soundtrack moakt. t Laidje Who's That Girl wuir n grode hit, moar de aandere singles The Look of Love en Causing a Commotion wuiren minder suksesvol. Noa dizze singles gong zai weer op tour, noamelk heur Who's That Girl Tour.

2006

Tiedens heur Confessions tour hong Madonna aan n kruus en druig zai n doornkroon, tiedens t laidje Live to Tell. Dit zörgde veur wereldwied ophef onder kristenen en kristelke laaiders. In Duutslaand riskeerde Madonna zulfs n gevangenisstraf van drij joar. Ook in Nederland perbaaierde de SGP jongern de vertonen van Madonna aan t kruus te veurkommen. Minister Donner van Justitie en de gemainte Amsterdam zeggen dat zai t optreden nait verbaiden kinnen.

Madonna het in oktober 2006 n raaize moakt noar Malawi, n klaain Afrikoans laand. Doar het zai n kind adopteerd mit de noam David. t Zörgde veur veul onrust in de wereld, omdat n haile bult mensen dochten dat Madonna dit enkeld veur de publisiteit dee. Madonna het, as reaksie doarop, heur aigen verhoal doan bie Oprah Winfrey, woarin zai vertelt al hail laank n daarde kind hebben te willen. Zai wol n kind oet de daarde wereld n kaans op n goud leven baiden.

Diskografie

• Madonna 1983
• Like a virgin 1984
• True blue 1986
• Who's that girl? (soundtrack) 1987
• You can dance 1987
• Like a prayer 1989
• I'm breathless 1990
• The immaculate collection 1990
• Erotica 1992
• Bedtime stories 1994
• Something to remember 1995
• Evita (soundtrack) 1996
• Ray of light 1998
• Music 2000
• GHV2 (Greatest hits volume 2) 2001
• American life 2003
• Confessions on a Dance Floor 2005
• I'm going to tell you a secret (live) 2006
• The Confessions Tour, Live From London (live) 2007
• Hard Candy 2008
• MDNA 2012
• Rebel Heart 2015
• Madame X 2019
• Confessions II 2026

Verwiezens noar boeten

Commons: Madonna (zangeres) - plaatjes, filmkes en/of gelüüdsbestanden.