Machu Picchu

Uut Wikipedia, de vrye encyklopedy
Historische hailegdommen Machu Picchu
UNESCO Wereldaarfgoudstee
Machu Picchu
Type Mixt
Regioon Latains Amerikoa en de Karrieben
Laand Peru
Joar 1983
Volgnummer 274

Machu Picchu (oetsproak matjoe piektjoe, van Quechua Machu Pikchu: "de olle baargtop")[1] was n Inka stad ien Peru, dij middelkerwies baauwd worden is om en bie 1440. t Het bestoan tou om en bie 1532, dou de Spanjolen t veroverde en de bevôlken oetruid het. t Is ien terazzen baauwd op n baargdèlloop op sikkom 2.430 meter boven zeehoogte. t Ligt even tin noordwesten van de stad Cusco ien t zuden van t laand.

Baauw[bewark | bronkode bewarken]

t Komplex is baauwd worden oet graniet. Dizze stainen kommen doar van oorsprong nait veur en der gruien ook gain bomen. Hou man de stainen omhoog kregen het, blift tou vandoag aan dag n mysterie. Summege alternatieve groeperen leuven dat de stainen deur boeteneerdse wezens omhoog hoald binnen, wat ook de perfekte aarchitektuur verkloaren zol. Dit wordt nait deur geschiedkundegen steund. Zai denken dat der n hail ìnde luu wazzen dij deur middel van hefboomeffekt de stainen omhoog drokt hebben.

Historie[bewark | bronkode bewarken]

De presieze funksie dij de stad doudestieds haar is nait zeker. Wel is zeker dat t n hailegdom was en dat t vaste bewonen haar. Dit bliek onderaandere oet t feit dat t stee oet 140 stainen gebaauwen bestaait dij grotendails woonhoezen wazzen. Ook binnen der sikkom 100 geribtes vonden van mìnsken, grotendails vraauwluu. Der wordt van oet goan dat ook de keunens van t Inka-riek hier ook woonden, messchain was t zulfs de heufdstad. De stad was middelkerwies onderverdaild ien drij gedailtes:

  • t Hailegdom, woar man normoal nait kommen mocht en woar de seremonies stee vonden.
  • t Populairedail, woar de lutje man woonde en woar de fasiliteiten wazzen.
  • en t Dail veur de priesters en de riekeluu.

Noadat de Spanjolen de stad verraggeld haren, laiten zai t stukkend aachter. t Wör ien 1782 offisjeel opnij ontdekt deur Jose Uriel Garcia.

Toerisme[bewark | bronkode bewarken]

Machu Picchu is ain van de belaangriekste toeristische stees ien Peru en wordt voak zain as t symbool veur de Inka's. Doagelks bezuiken om en bie 2.000 luu t stee en is ien 2007 erkend worden as ain van de Zeuven Nije Wereldwonders. t Staait op de UNESCO Wereldaarfgoudliest sunt 1983.


Rifferenties[bewark | bronkode bewarken]

  1. Teofilo Laime Acopa, Diccionario Bilingüe, Iskay simipi yuyay k'ancha, Quechua – Castellano, Castellano – Quechua: machu - adj. y s. m. Viejo. Hombre de mucha edad (Úsase también para animales). - machu - s. m. Anciano. Viejo. pikchu - s. Pirámide. Sólido puntiagudo de varias caras. || Cono. Ch'utu. machu pikchu - s. La gran ciudadela pétrea que fue quizá uno de los más grandes monumentos religiosos del incanato, entre el valle del Cusco y la selva virgen (JAL). || Monumento arqueológico situado en el departamento actual del Cusco, junto al río Urubamba, en una cumbre casi inaccesible (JL).