Kroezeboom

Den kroezeboom bie Fleringen in Tweante.

Den Kroezeboom is nen oalden eek met nen stamumtrek van 7,25 meter bie Fleringen in Tweante. Et is een van de öaldste beum op et Nederlaandse groondgebeed. Nöast den eek steet een Rooms kapelleken veur Maria. Den boom trekt völ bezeukers, umdat he tuske de 400 en 600 joar oold is, umdet et der heel heanig is en den boom op ne mooie stea steet. Et is ne geleefde stea um te trouwen. Ook majt der jongeleu gearn op de beankskes roondhangen.

Gebroek

Et wörd zejd det den kroezeboom nen kruusboom was. Um laand te verdelen, breuken boeren vrogger herkenningspeunten in et laand. Den boom zol op een kruuspeunt van verskillende stukken laand stoan. Ook kan et wean at hier vrogger rechtdag höalden wör. Zo wör den boom et tekken van gerechtigheid. Et gavven de umgewing nen gewichtigen anblik.

Tusken et 16de en 17de joarhonnerd stund der een Hilligenhuesken. An wel of dit kapelleken wiedet was, is nich bekeand. In de tied van de Reformasie wörden alle Rooms-Katholieke tradisies verböaden. Et kapelleken wör ook daal höwwen. Nen roondtrekkenden preester, Hendrik Smithoes, blef toch hemelik met ne wage onner den boom eucharistiedeenste opvoren. Et wör ne bedevoartsstea veur Roomsken. Roond 1730 was et aflopen met de verearingen roond den kroezeboom.

In et 20ste joarhoonderd begunnen de leu wier geleuwige wearde an den kroezeboom te hechten. In 1909 höalden ze ne mis bie den boom um te vieren dat de H. Pancratiuskeark in Tubbig 100 joar doarveur weer teruw gevven was. In dat joar wör der ok weer ne kapel bouwd, in niejgotiese stiel. Dissen was wiedt an et Healige Harte van Kristus. Pastoor Von Bönninghausen leut een beeld van 1,50 meter hoog oet steen houwen. Dit steet sind 1971 in de St. Pankratiuskeark in Tubbig. Et kapelleken wör in 1944 weer ofbrökken en vervöngen deur ne neie, hoaltene kapel met vakwerkmuren.

Leaftied

Den boom wörd wal es skatt tusken de 1000 en 700 joar oold, mer det lik meer fantasie as woarheid. Fleringen wörd al in et joar 933 neumd, mer dat wil nog nich zeggen at den boom zo oald is. Boomkenners skatt um tusken de 400 en 500 joar oold. Op foto's van net noa den oorlog is te zeen at den boom nog nich deurmiddeln spletten was. Doaran is te zeen at he nog nich zo oold as wat wal es dacht wörd.

Onnerhoald

Et geet nich aait evven good met den Kroezeboom. Umdat den boom begun te splitten en doardeur in et middeln begun te rotten, hebt boomchrirurgen et slechte hoalt vortskraapt en de twee delen met iezeren pennen an mekaar veraankerd. Den kroes wörd met stoalkabels bie mekaar höalden.

Umdat et völle toeristen trekt en umdat der nog regelmoatig biejeenkomste höalden wordt, blif den boom ne belangrieke stea veur de umgewing. Um der nen boomchirurg bie te halen is geald neudig. Doarum hebt ze in Fleringen zölfs ne stichting opricht veur et behoald van den boom.