Korfoe

Korfoe of Kerkyra (Grieks: Κέρκυρα (Kerkyra), Latien: Corcyra; Italiaans: Corfù) is t meest noordelik elegen Griekse eilaand in de Ioniese Zee. t Beheurt mit onder aandere Zakynthos en Kefalonia tot de Ioniese Eilaanden in Griekelaand. Korfoe hef om en bie de 113.000 inwoeners, van wee zwat n darde in de gelieknamige heufdstad woent. t Gelieknamige departement besteet uut t eilaand Korfoe en n koppel aandere eilaanden.

Geografie en toerisme[bewark | bronkode bewarken]

De noordoostelike kustliende van Korfoe ligt veur de kust van de Albanese stad Sarandë, t is van mekaar escheien deur n zeestraote die in wiedte verschilt van 3 tot 23 kilometer, terwiel de zuudoostkaante van t eilaand veur de kust van t Griekse departement Thesprotia ligt. De naam "Korfoe" is n Italiaanse versie van t Byzantiense Κορυφώ (Korifo), dat "stad op de bargtop" betekent, en kömp van t Griekse Κορυφαί (Korife) (dat 'toppen' betekent), waormee de twee bargtoppen van Paleo Frourio beduuid wörden.^[1] t Oppervlakte van t eilaand is ongeveer 588 km², t eilaand is ongeveer 64 kilometer lange, en op t breedste punt is t 32 kilometer breed.

De heufdstad van t eilaand is t gelieknamige Korfoe of Kerkyra, en ligt an de oostkust van t eilaand.

De kust is veural rotsachtig, in de veule baaien he'j griendstraanden. Dat is één van de redens waorumme meensen hier grege snorkelen. t Hoogste punt van t eilaand is de 906 meter hoge Pantokrator.

Vanwegen de relatief hoge regenval is t eilaand merakels greun en hef t n gunstig klimaot. t Is dan oek n populaere vakaansiebestemming.

Op veule plaotsen he'j oliefbomen staon. Tiejens de Venesiaanse tied wördden an de bewoeners n premie van n goudstuk beleufd veur elke tien oliefbomen die eplaant wördden. De Venesiaanse behoefte an olie was groot. De bewoeners hebben op elk vrie stukjen laand oliefbomen eplaant. Oek noen nog vormp oliefolie n belangriek produkt op Korfoe. Véúr de opkomst van t massatoerisme wördden de pries van de grond op t eilaand veurnamelik bepaold deur t antal oliefbomen. De olieven wörden op Korfoe oogst deur grote netten op de grond onder de bomen uut te rollen en twee tot dreemaol per weke de aofevöllen riepe olieven te verzamelen. Oliefbomen op Korfoe hebben karakteristieke gaoten in de stamme die veroorzaakt zollen wörden deur n parasitaere insekt. Dit veraandert niks an de kwaliteit van de olieven. Op t eilaand wörden oek de oliefolie veur t beroemde waorenhuus Harrods in Londen emaakt.

Geschiedenisse[bewark | bronkode bewarken]

Van de 14e eeuw tot 18e eeuw - meer as vier eeuwen - hef Korfoe onderdeel ewest van t riek van Venesië. De invleud van de Venesiaanse anwezigheid is nog arg groot. Oek Frankriek en Groot-Brittannië bezetten t eilaand n hortjen totdat t, bie de Griekse onaofhankelikheid, deel gung uutmaken van Griekelaand. Onder meer op de architektuur, veural in de heufdstad Korfoe, hebben welende machthebbers der stempel edrokt.

Korfoe hef in tegenstelling tot aandere delen van Griekelaand nooit bezet ewest deur de Turken. In twee spesifieke opzichten is t eilaand aanders as gevolg van disse Turkse 'aofwezigheid'.

t Grote antal sipressen: disse bomen bin in de aandere Griekse gebiejen deur de Turken ummehakt umdat ze geleufden dat ze ongelok bröchten. n Aander verhaal is dat de Turken sipressenhout gebruukten veur de scheepsbouw.
Gien huzen die blauw-wit evarfd bin. In aandere Griekse gebiejen wördden veule huzen in de Griekse kleuren eschilderd as protest tegen t verbod van de Turken um de Griekse vlagge te gebruken.

Een van de belangriekste toeristiese attraksies is t Achilleion, n paleis dat tussen 1890 en 1892 ebouwd wördden deur de Oostenriekse keizerin Elisabeth (Sisi). t Neoklassieke gebouw wördden deur de keizerin verneumd naor heur klassieke held Achilles.

Gemeenten[bewark | bronkode bewarken]

Der bin 15 gemeenten op Korfoe: De gemeente Korfoe (Kerkyra) is vanaof 2011 verdeeld in vuuftien deelgemeenten (dimotiki enotita) volgens de onderstaonde tabel. In 2001 was de leste offisiële volkstelling.^[2]

Gemeentelike Eenheid	Griekse naam	Inwoeners 2001
Agios Georgios	Άγιος Γεώργιος	4.958
Achillio	Αχίλλειο	10.319
Erikousa	Ερείκουσα	698
Esperion	Εσπερίων	8.136
Feakes	Φαίακες	6.488
Kassopea	Κασσωπαία	2.787
Korfoe-stad (Kerkyra)	Κέρκυρα	39.487
Korissia	Κορισσία	5.206
Lefkimmi	Λευκίμμη	6.704
Mathraki	Μαθράκι	297
Melitiis	Μελιτειείς	6.690
Othoni	Οθωνοί	663
Paleokastritsa	Παλαιοκαστρίτσα	4.395
Parelii	Παρέλιοι	7.197
Thinali	Θινάλι	5.512

Verkeer en vervoer[bewark | bronkode bewarken]

De lochthaven van Korfoe is Lochthaven Korfoe Ioannis Kapodistrias.

Je kunnen aandere eilaanden bezeuken vanuut de haven van Korfoe-stad of vanuut de haven van Lefkimmi, dat veul zujeliker ligt. De reize per schip naor t Griekse vastelaand, naor de havenstad Igoemenitsa, is veul korter vanuut Lefkimmi.

Mit de busse ku'j reizen mit de blauwe en de greune bussen. De greune bussen riejden naor veerder elegen plaotsen op t eilaand, terwiel de blauwe bussen gebruukt wörden veur Korfoe-stad en umgeving.

Klimaot[bewark | bronkode bewarken]

Maond	Jan	Feb	Mrt	Apr	Mei	Jun	Jul	Aug	Sep	Okt	Nov	Des	Jaor
Hoogste gem. °C	14	14	16	19	23	28	31	31	28	23	18	15	22
Leegste gem. °C	5	6	7	9	13	16	18	18	16	13	9	7	11
Neerslag in mm	132	137	99,1	61,0	35,6	15,2	7,60	17,8	76,2	147	180	180	90,8