Kasteel Doorwerth

Kasteel Doorwerth is nen waterburcht in de uterweerden van den Rien noabi-j et darp Doorwerth, in de Nederlandse previnsie Gelderlaand.

Geskiednis

Et kasteel wodden veur et eerst eneumd in 1260, toon et deur den heer van Vianen wodden belaegerd en in brand estokken. Dit was vermeudelek nen straf, opelegd deur den graaf van Gelre, um korte metten te maken met de roofzuchtege wieze van den burchtheer Berend van Dorenweerd. De doaropvolgende 20 joar hef den toonmoaligen burchtheer (Berend van Dorenweerd of zien zönne, Hendric) den burcht wier hersteld. (Andere bronnen spraekt van de stichting alhier van nen waterburcht deur Hendric van Dorenweerd umstraeks 1280).

In 1430 verkreg Reinald van Homoet et kasteel en ging doar staevig uutbreiden. De doaropvolgende eigenoaren van et kasteel verblaeven doar moar zelden en dit is woarschienlek ene van de redenen dat Doorwerth nog ne zeer middeleeuws andoonde uutstroaling hef. Dat et kasteel et rampjoar 1672 heelhuuds oaverlaefd hef is te danken an de meujte van den toonmoaligen eigenoar, Anton van Aldenburg, nen belangrieken Deensen edelman.

De van Aldenburgs wonden moar zelden op et kasteel en et begon langzaam in verval te raken. In 1837 wierd et kastele verkocht an Jacob Adriaan Prosper, Baron van Brakell, den et vervallen kasteele herstelden en doar zelf ging wonnen. Noa den dood van ziene weduwe zetten et verval wier in. In 1909 wodden ten slotte de veraeneging 'Den Doorwerth' op-ericht dee n joar later et kasteel in bezit wist te kriegen. Et kastele was zwoar beschadigd tiedens den Tweeden Waeldkrieg. Moar et kasteel is doarnoa wier helemoal restaurierd. Vandage bunt doar et Museum veur Natuur- en Wildbeheer en Museum Veluwezoom evestegd.

Et gebouw

Et oldste deel, ebouwd deur Berend of Hendric van Dodeweerd, besteet uut nen rechthookegen wontoorn van rundumme 10 bi-j 15 meter den eurspronkelek umgracht was en noo nog is te herkennen as den oostvlöggel van vandage. Den zudeleken vlöggel wierd durende de 14de eeuwe teggen et kleine kasteele an-ebouwd en later volgen doar nog meer uutbreidingen. Den massieven wontoorn an den noordvlöggel met ziene uutkreggende toorntjens op de hookpunten, wierd durende de 15de eeuwe ebouwd. Zi-j wet echter neet wanneer. Der wöd an-enommen dat Reinald van Homoet verantweurdelek is veur dizze undernaeming umdat der raekeningen bestoat uut de joaren 1435-1436. Doarin wöd esprokken van omvangrieke bouwundernaemingen. Wal is zeker dat van Homoet verantweurdelek is veur talrieke uutbreidingen zoas et uutbreiden van den zuudvlöggel en et verplaatsen van den heufdingang. Ok den veurburcht kump in anleg uut de 15de eeuwe.

De leste grote uutbreiding vund plaatse halverwaege de 16de eeuwe met et uutbreiden van den zuudvlöggel en den bouw van den massieven zuudwest toorn (den in de 18de eeuwe esloopt wodden um in de 19de eeuwe wier te wodden op-ebouwd.

Spoken

Van kastele Doorwerth is éen raegelmoatig weerummekeernd spookverschiensel bekand. Der zol in et kasteel den geest runddwoalen van n deerntjen dat vrogger binnen de muurn van et kastele verhungerd is. Zi-j wöd et meest ezeen in den noordvlöggel, in et biezunder de jachthalle.

Trivia

Den Nederlandsen regisseur Stephan Brenninkmeijer wodden op 27 juni 1964 in et kasteel eboarn en wonden doar tot 1970
Erik Hazelhoff Roelfzema skref tussen 1969 en 1970 in et restaurant Baeulieu, dat doar was in et kastele, zien book Soldoat van Oranje 1940-1945.
Den kunstskilder Jan Hoynck van Papendrecht had in ene van den kasteelkamers n atelier

Galeri-je

Heufdgebouw
Anzicht op Doorwerth
De achterkante van et heufdgebouw, met den 13de eeuwsen noordvlöggel op den veurgroand
Ofbeelding van kasteel Doorwerth uut 1744.

Uutgaonde verwiezingen

Doorwerth op de webstae Mooi gelderlaand

Commons: Kasteel Doorwerth - plaatjes, filmkes en/of gelüüdsbestanden.