Jos Lansink

Uut Wikipedia, de vrye encyklopedy

Jozeph (Jos) Johannes Gerardus Marinus Lansink (Rossum, 19 meart 1961) is nen Tweants-Belgiesen springruuter.

Lansink köm oonder n andacht in 1988, doo't hee de Grote Pries van Tweante en t CHIO in Rotterdam wun en tweedes wör op t Neerlaands Kampioenskop, woerduur't he met moch doon op de Olympiese Zommerspöllen van Seoel. Met zin peard Felix haalden he doar de zeuwende plek in de eankele klasse. Met t Neerlaandse manskap wör he viefdes in de laandenwedstried. Met Felix wör he ook doardes op t Europees kampioenskop van 1989 in Rotterdam.

n Opvolger van Felix was t peard Egano. Met dit peard haalden Lansink ne doarde plaatse op t Europees kampioenskop in t Fraanske La Baule in 1991. Met t laadenmanskap wör he eerste. Op de Olympiese Zommerspöllen van Barcelona in 1992 haalden he met Piet Raijmakers en Jan Tops ne gooldene medalje in de laandenwedstried.

Op de Olympische Spöllen van Sydney in 2000 dee Lansink vuur t lest vuur Neerlaand met. Met Jeroen Dubbeldam, Jan tops en Albert voorn haalden he de viefde plek in de eandklassering van de laandenwedstrieden.

Um dee tied wör der ne nieje regel in evoord in de ruutersport det ruuter en peard oet t zelfde laand mossen stammen. In dee tied warren der skoonwal gin toppearde oet Neerlaand, en doarumme besleut Lansink samen te goan met n Belgiesen peardefokker Leon Melchior, en hee nöm in 2001 n Belgiesen nasjonaliteit an. Zin grötste weenst was in 2006, doo't he op de Wearldruuterspöllen in Aken wearldkampioen springen wör.