Huuslook

't Geslacht huuslook (ok nuumd as: donderboard en donderblad) (Sempervivum) is nen geslacht van oangeveer 40 soorten vetplaanten. Disse plaanten uut de vetplaantefemilie gruit op nen rozet. Geliek-an de aander lèden van disse femilie sloat ze water op in heur blader, zodat ze gruien kunt op nen stienachtige bodem of op dakpannen.

D' huuslook kömp van orsprönk veur op 't gebied rond Marokko töt an Iran. D' huuslook kömp èèm-iens ok veur op de bargen van 't Iberisch schiereilaand, de Alpen, de Karpaten, 't Balkangebargte, Turkije, de Armeense bargen, en 't Kaukasusgebargte. Deurdat de plaanten van 't geslacht huuslook zoo best water vaste hoalden kunt, gruit ze vake op rotsen woor völle zunlicht op kömp.

De namme 'donderboard' giet trugge op nen beschrieving van Karel de Grote: "et ille hortulanus habeat super domum suam Jovis barbam" (= "en elke tuunkeerl mut op zien dak jupitersboord loatn gruien"). In 't bi-jgeleuf zol 't kruud nen huus wat dit kruud op 't dak gruien hef, tègen blikseminslag bescharmen. Jovis barbam betekkend 'de board van Jupiter', en Jupiter stön geliek met de Germaansen god Donar, god van de donder.

Van dit gebruuk kömp de donderbessem vot, zo as dissent, versimpeld, ofbeeld bint op de gevveltèkens op Twente, Achterhoek en dèlen van Sallaand.