Houtribdiek

De Houtribdiek (oek wel bekend as: Markerweerddiek of Diek Enkhuzen-Lelystad) is n waoterkering in Nederlaand. De diek (feitelik n dam) is an-eleegd tussen 1963 en 1976 en scheit t Iesselmeer van t Markermeer. De 26 kilometer lange diek was bedoeld veur de inpoldering van t zujelike gedeelte van t Iesselmeer tot de Markerweerd, mer in 2003 hebben ze besleuten dat ze disse Flevopolder niet meer gaon anlegen.^[1]

Over de diek ligt n weg die de stejen Enkhuzen (provinsie Noord-Hollaand) en Lelystad (Flevolaand) verbient. Disse weg is onderdeel van de N302 en misschien in de toekomst van de N23. Veur de scheepvaort bin der dree sluzekomplexen: de Krabbersgatsluzen (beroepsvaort) en t Navidukt Krabbersgat (rekreasievaort) bie Enkhuzen, en de Houtribsluzen bie Lelystad. t Navidukt bie Enkhuzen is n kombinasie van n sluze mit n aquadukt en maakt t meugelik dat scheepvaort en wegverkeer mekaar kunnen krusen zonder dat ze last van mekaar hebben. Naost de Krabbersgatsluzen en de Houtribsluzen liggen spuisluzen die neudig bin veur de regeling van t waoterpeil in t Markermeer en Iesselmeer. Ongeveer halverwegen de diek ligt de uutwiekhaven Trintelhaven.

Der is n projekt Marker Wadden waorbie der n stel natuureilaanden an-eleegd wörden ten zujen van de Houtribdiek. Naor verwachting beginnen ze in 2016 mit dit projekt.

De gemeente Lelystad gaf de weg over de diek de naam Markerweerddiek. Offisieel wördt hiermee allinnig t gedeelte van Lelystad tot an de provinsiegrens an-eduud. De naam wördt liekewels oek veur de hele diek gebruukt.

Busdiensten

In 1976 wördden deur de Flevodienst voort busliende 56 over de diek in gebruuk eneumen tussen Lelystad en Enkhuzen. Disse busse ree deurdeweeks tien keer per richtige, zaoterdes negen keer en zundes en op feestdagen zeuven keer per richtige in n patroon van een keer in t ure of een keer in de twee uren. Vanaof 1981 wördden de liende as busliende 146 deur de Verenigde Autobus Diensten (VAD) erejen (de Flevodienst was in de VAD op-egaon) en had n onregelmaotige dienst, mit n amparte zoemer- en wienterdienst. Zoemers was t zelfde as veurheer mit liende 56, swienters wördden der op alle dagen zeuven keer per richtige erejen (in t weekeinde mit laotere ritten as deurdeweeks, zundes weer laoter as zaoterdes). Vanaof 1988 wördden dit liende 150 die in Lelystad vanaof t nieje treinstasion gung in de plaotse van t Noorderwagenplein. Liende 150 ree deurdeweeks tien keer per richtige in de zoemer, en swienters n keer of achte; zaoterdes negen keer respektievelik zeuven keer en zundes zeuven keer per richtige (zoemer en wienter). In 1994 wördden de VAD onderdeel van t nieje Midnet. Naodat de bevoegdheid van disse liende in 1998 overgung naor de provinsie Noord-Hollaand (de konsessie van Midnet veur Gooi en Vechtstreek), wördden der alsmer meer eschrapt in de dienstregeling. Sinds desember 2008 is der allinnig nog mer n busliende veur schoelkienders een keer per dag n rit hinneweer over de diek.