Hermann Boßdorf

Hermann Boßdorf (Wiesenbörg/Mark, 29 oktober 1877 - Hambörg, 24 september 1921) was een Platduuts tenielschriever.

In 1888 gunk 't gezin Boßdorf naor Hambörg. Krek as zien va kwaamp Hermann bij de posterijen te warken. Hij was een bezeten lezer en schriever en stund mit de tenielschriever Fritz Stavenhagen hij an de wiege van 't moderne Platduutse teniel. Zien wark, beïnvloed deur de Zweedse schriever August Strindberg, wördt ekenmarkt deur symbolisme mit expressionistische elementen. Hij schreef een köppel volksbliedspöllen van hoge kwaliteit.

Boßdorf was zien hiele levend gengelig en had in 1915 een psychische instörting as gevolg van veule nachtdiensten bij de telegrafie in 't kader van de oorlog. In 1917 much e mit pensioen. Mit de schrieverije perbeerde hij meer te verdienen um te zörgen veur zien vrouwe en die heur inwonende moeder. Wieder ondersteunde hij zien eigen moeder en zien briedere familie. Toen as Boßdorf zien stok De Fährkrog in 1918 veur 't eerst opevoerd wördden, maakte det veule lös. Veur de Niederdeutsche Bühne van Richard Ohnsorg schreef e vervolgens, esteund en anefieterd deur Ohnsorg, een hiele riege stokken.

In Kiel viej de Hermann-Boßdorf-Weg; in Bremen de Boßdorfstraße.

Schrieverije

Hamborg de Baas! (Hambörg: Quickborn-Verlag, 1938)
Hermann Bossdorfs alte Heimat (Hambörg: Hermes, 1950)
Gesammelte Werke (elf dielen onder redactie van Willy Krogmann, Hambörg: Hermes, 1952-57)
Kramer Kray (bliedspöl, Verden: Mahnke, 1960)
De rode Ünnerrock (bliedspöl, Verden: Mahnke, 1960)
Bahnmeester Dood (drama, Verden: Mahnke, 1960)
De Fährkroog: En dramatisch Glieknis in dree Akten (allegorische drei-akter, Verden: Mahnke, 1960)
Dat Schattenspill (bliedspöl, Verden: Mahnke, 1960)
Swienegel op Reisen: Un anner fabel-hafte Tiergeschichten (Hambörg: Quickborn-Verlag, 1983)

Bronnen

Hermann Boßdorf op Peter Hansen zien Die niederdeutsche Literatur

Dit stok is eschreven in 't Zuudwest-Drèents.