Heilige Roomse Riek
Et Heilige Roomse Riek was nen politieken trop van laanden in West- en Centroal-Europa tiedens de Middeleeuwn. Et ontstoand uut et oosteleke deel van et Frankiese Riek bi-j et Verdrag van Verdun (843). Et Riek bestoand bi-jnoa n millennium (tied van doezend joar), tot et vort ging in 1806.
In de 15de eeuwe wodden de name uutgebreid tot Heilige Roomse Riek der Duutse Noatie (Sacrum Romanum Imperium Nationis Germanicae in et Latien). Et Riek wodden 'Rooms' eneumd, umdat et in-esteld wodden as veurtzetting van et Romeinse Riek. Dit wierd deur de toonmoalige Westerse weald ezeen as heel belangriek, want christeleke veurspellingen (zee et Biebelbook Daniël) hadden veurspeld dat de weald noa et veerde riek (et Romeinse Riek) zol vergoan. De Byzantienen vonden dit moar kwats, umdat zi-j zich as de veurtzetting van et eurspronkeleke Romeinse Riek zagen. Volgens dee leu was der geen gevoar zolange et 'Romeins'-Byzantiense Riek blef bestoan. De anduding 'Heilig' wodden gebruukt um den nauwen band met de Rooms-kattelieke Karke an te geaven. In de 15den eeuwe wodden doarnoast ok de benaming Duuts derbi-j edoan umdat vanof toon de meeste inwonners Duuts as modersproake hadden en de Duutse Habsburgers et veur et zeggen kreggen en den keizer leaverden. Ne bekende uutsproake van Voltaire was dat et Riek neet Romeins, neet heilig en eavenmin n riek was.