Happy stone

Uut Wikipedia, de vrye encyklopedy
Nå navigaty springen Nå söken springen
Een bliede stien mit een oele, in Drenthe op de kiek ezet
Happy stones maank onbeschilderde kiezels in Portugal
Kindness rocks bij een ziekenhuus in Canada um zörgparseniel te bedaanken tiedens de coronapandemie

Een happy stone ('bliede stien'), doodle stone ('krabbelstien') of kindness rock ('vrundelijkheidsstien'; 't meervold kindness rocks gef de woordspeuling 'vrundelijk wezen is machtig mooi') is een beschilderd stientien det argens buten achtereleuten wördt zodet een aander 't toevallig kan vienden.[1]

Oorsprong[bewark | bronkode bewarken]

De hobby van 't beschildern van stienties um dizze reden kwaamp op in de jaoren veur de coronapandemie die in 2020 begunde. De oorsprong van de bliede stienen wördt ezöcht in 't Amerikaanse The Kindness Rocks Project, een beweging umme stienties mit positieve bosschoppen te beschildern die in 2015 ontstund en naor aandere laanden aoversprunk.[2][3] Deur de pandemie kreeg 't beschildern van stienties een extra stöttien in de rogge.[1]

Verveerdiging en verspreiding[bewark | bronkode bewarken]

Een bliede stien maak ie deur op iene kaante van een gladde kiezel een ofbielding te schildern. Det kan een feguurtien wezen, een abstracte versiering of wat ok. Ok kuj een positieve bosschop schrieven; veural in The Kindness Rocks Project is een bosschop op een gekleurde achtergrond, mit of zonder feguurtien derbij, de gebrukelijke gaank van zaken. Op de aandere kaante wördt vake een ziede op Facebook of Instagram enuumd waoras de viender een foto van 't stientien kan plaatsen umme te laoten zien det 't evunden is. Mangs stiet der op 't stientien een postcode, waordeur aj weet waor in 't laand 't weg kump.

De viender van een bliede stien kan die holden of argens achterlaoten, zodet dizzend wieder kan zwarven.[4] In Nederlaand, waor ze bezunder drok bint op 't maken van bliede stienen, wördt dit wal ies anegeven mit teksten as delen = lief en houden of zwerven. Veur 't beschildern van stienties gebruukt ze stiften mit niet-giftige acrylvarve. Soms wördt der eerst een basis van gesso of acrylvarve anebracht. Um de ofbielding te bescharmen giet der een laogien vernis aoverhenne.

Punten van zörg[bewark | bronkode bewarken]

Der bint in de media wal berichten verschenen aover minder mooie kaanten van 't verspreiden van beschilderde stienties. Stienties die beveurbield op grösvelden in parken achtereleuten wördt, zolden deur elektrische grösmeiers egrepen en vurteslingerd kunnen wörden. Ok zolden goenend hebben eziene det kleine kiender beschilderde stienties die ze vunden naor de enten keilden. As bliede stienties in bloemparken achtereleuten wördt, hej kaans det lu de bloemen verstraampelt.[5][6]

Wieder is niet iederiene der bliede mit det beschilderde stienties ok achtereleuten wördt in netuurgebieden of nationale parken. Det zol ingaon tegen 't principe umme daor gien mèenselijke speuren achter te laoten (in 't Engels vake leave no trace enuumd).[7] Hiel wat webstees doet een beroep op 't gezonde verstaand en vraogt de mèensen um gien bliede stienen achter te laoten op gevaorlijke plekken, zoas in de buurte van wegen of op lastig te bereiken heugtes. Ok wördt mèensen evraogd um uut milieu-aoverwegings gien glitters of plastic ogies op de stienties te plakken.[8]

Beweegredens[bewark | bronkode bewarken]

Volk van alle leeftieden döt an stienen schildern. Verscheiden mèensen hebt in de media anegeven det ze det doet umme bliedschop en positieve gevulens te verspreiden. Een doel det daormit samenhangt is lu een harte onder de rieme stikken mit oppeppende bosschoppen of mit een bedaankien (zoas veur zörgparseniel tiedens de coronapandemie). Ok is 't beschildern van stienties iets waj makkelijk allennig in huus kunt doen, wat goed uutkwaamp in een tied waorin deur de pandemie alderhaande groepsactiviteiten niet meugelijk waren. Aover bliede stienen bint een beste bulte webstees en sociale-media-zieden opezet, en deur 't internet hef 't fenomeen hum rap kunnen verspreiden.[9]

Rifferenties[bewark | bronkode bewarken]

  1. 1,0 1,1 Trouw: Creatievelingen laten overal vrolijk beschilderde 'happy stones' achter om je een positief gevoel te geven, 20 jannewaori 2021
  2. The Guardian: Rocking all over the world: the painted pebble trend crossing continents, 6 meie 2018
  3. The Kindness Rocks Project
  4. NH Nieuws: 'Happy stones' verstoppen in natuur: "Zorgen voor beetje vrolijkheid", 24 jannewaori 2021
  5. Shropshire Rocks craze 'a danger' for Shrewsbury park users, says council, 26 augustus 2017
  6. Stuff: Rock craze banned from three parks as council publishes 'how-to' guide, 21 november 2017
  7. National Parks Conservation Association [V.S.]: Between a (Kindness) Rock and a Hard Place, veurjaor 2018
  8. DeStadGorinchem.nl: Kira vrolijkt Gorinchem op met Happy Stones, 18 september 2020
  9. EenVandaag: Wat doen die gekleurde steentjes toch overal? Marjo en Ria maken anderen blij met happy stones, 4 juli 2021
Nuvola apps ksig.png Dit artikel is eschreven in 't Zuudwest-Drèents.