Glanerbekke
De Glanerbekke öf Mulderinksbekke is nen ziejstroom van n Deenkel. De bekke öntspröng in t Duutse deal van t Oamsven, net oawer de greanze met Neerlaand in t distrikt Borken in n dealstoat Noordrien-Westföale.
De bekke ström an n Neerlaandsen kaant van de greanze deur de gemeante Eanske. In de Eanskse niejbaawwiek De Eschmarke makket de bekke deal oet van de doar an-legde ekozone. Doarnoa vörm de bekke biej t dernoar vernöamnden De Glanerbrögge oawer ne längte van önnevear 2 km ne netuurlike greanze met de Pruus. De bekke mönd biej De Glaan in n Deenkel.
t Woaterskop Woaterskop Regge en Deenkel hef n gröt deal van de bekke restaureard. Hierveur he't woaterskop twea olde meanders an-kocht en öp t woatersyteam an-slötten en öp eankele ploatsen n niej kreunkelnd bekkeberre groawen. Wieter is der ne vistrappe an-legd (disse leg biej Oikos, nen wiek in De Glanerbrögge) en öp eankele pläkke laanks de euver wälskens metseld met nestelmöglikheaden veur n iesvoggel en n gealn kwikstoart öf grötten gealn kwikstoart.
Laanks de Glanerbekkewegge hef Natuurmonumenten ne nieje, breadere bekke an-legd as de hierveur nöamde bekke. Ok bint in dit niej an-legde deal n antal ziejkaanten met keaien dich-legd öm bodemerosie te veurkömmen. Oawer de nieje bekke bint twea bröggen an-legd, woareuver de Pruus leupend öf feetesnd binnen-goan kän wörn. Dit healn stök is in 2006 an-legd veur amfibieën as kikkern en kleaine woatersalamänder, met n hoop det der meardere seurte plänte goat greuien dee der veurhenne nich öf zoowat nich greuien, zoo-as de geale lisse, t woaterdreablad öf n vennewortel.