Geisha

Vraauwluu poseern as maiko (kandidoat-geisha) ien Kyoto, Japan dij traditsjonele furisode en okobo droagen.

Geisha (Japans: 芸者, oetsproak kheesja) of Geiko (Japans: 芸妓) binnen traditsjonele, vraauwliekse Japanse artiesten, dij de Japanse kunsten van klassieke muziek, daans en proaten goud beheerden. Ook al wordt t voak docht, geisha binnen gain prostituees.

De wereld van de geisha is laank gehaim wèst. Tot aan t ìnd van de Twijde Wereldkraig, môr wereldlieks zain tot aan de joaren '80 tou, wazzen geisha misterieuze personen dij ien n haile aaigense wereld van vraauwluu leefden. Ien de twijde haalve van de 20e aive gongen verschaaidene (voak veurmoalege) geisha n open schip op over heur leven as geisha.

t Leven van n geisha begunt as zai noar n geishaschoul en n geishahoes (okiya) goan. Ien zonnen hoes leven meerdere vraauwluu soamen dij apmoal geisha worden willen, môr woarvan aine môr ien t hoes wonen blieven mag, en dus adopteerd wordt deur de hoesvraauw, dij vrouger ook geisha wèst het. De jonge wichter begunnen ien hoes voak as dainstwichter, môr worden, noa de moat zai oller worden, aal meer aksepteerd as geisha.

Geisha, dij de shamisen bespeult, op n traditsjoneel Japans schilderij

Liek as ien aander Japanse subkultuurn, behaalve te nijmoodse cosplay en aal, gaait t bie de geisha veuraal om disipliene en traditsie. Dit wör heur leerd op n geishaschoul. t Woord geisha is letterlieks Japans veur artieste, dus mos n wicht ales leern woar of mannen dij heur ienhuurden verlet van haren. Maisttieds betaikende dit ook seks, môr t gong veuraal om de daans, muziek (shamisen, n drijsnoareg instrumìnt) en t proaten, de wieze van expressie. As n geisha ien dainst is, proat zai binoa aaltieds as of ales wat zai sègt n gedicht is. As n geisha allìnd dainst dut veur heur aaigense seksuele verlet, wör zai oet de vlinthaarde wereld van de geisha gooid.

Deur de kunsten te leren en tou te pazzen, mozzen geisha as t woar "rekloame" veur heurzulf môken, woarnoa man baiden gong veur heur eerste keer. Dijdent woar't t maiste op boden wör, wör adopteerd deur de hoesvraauw. Doarnoa kriegt de geisha opdrachten om op te treden en mìnsken te bedainen. t Opscheppen en opdainen van eten en dranken as gruine tee en sake binnen bekende bezegheden van n geisha.

Noa de Twijde Wereldkraig is de traditsie van de geisha n bitke verwotterd. Elkenain mit n kimono aan nuimde zokzulf geisha en dainde eten op, enzowieder aan. Doch zugt man dat der nog aal wel n poar gemainschoppen binnen van geisha dij de traditsies nog wel vôlgt. Doarnoast hest nog de binoa geisha, dij geisha speulen ien Japanse restorants enzo. t Leven van de geisha intereseert de wereld anders wel. Mit films as The Geisha House (1999) en Memoirs of a Geisha (2006) kwam de wereld goud ien aanroaken mit de broekens van de tradisjonele Japanse vraauwen.