Fivelgo

Lokoatsie van Fivelgo in Grunnen

Fivelgo in de Zeelanen om t jaor 1300.

Fivelgo (of: Fivelingo) is n streek in de provìnzie Grunnen. De westgrèns was t Moarvliet, in tieds dat de oostgrèns de Tjamme was dij ongeveer overain komt mit de oostgrèns van de gemainte Slochter. t Grenst in t westen aan Hunzego, in t oosten aan t Oldambt en de Emsmonden en in t zuden aan t Gerecht.

De noam Fivelgo betaikent go (streek) van de Fivel, n veurmoaleg revierke in dizze streek. Fivelgo was t twijde lid van de Ommelanden en har as heufdstad n Daam.

Fivelgo wordt kenmaarkt deur de moaren, börgen en de gasbel bie Slochter. Ook de zeehoaven Delfziel en t middelaiwse stadke n Daam geven dit gebied zien karakter en zörgen veur n hoge ekonomische positsie van dit gebied.

Net as Hunzego was Fivelgo was van oorsprong n Fraise go. t Was ain van de kwartaaiern van t Fraislaand tuzzen Laauwers en Ems.

t Gebied bestond oet drij onderkwartaaiern:

• Duurswolderdail (Duurswold),
• Hoogelaandsterdail ('t Hoogelaand) en
• Oosterdail.

Rond de 13e aiw wuiren dizze onderkwartaaiern ofschaft en wuir t go van de Fivel as ain gewest zain. De, in t Oldfrais stelde, Fivelgo-wetten môken n belaangriek dail oet van de overbleven Oldfraise teksten.

Schreven in t Oldambtsters