De Lut

De Lut (Hollaands: De Lutte, tiedns Carnaval: Tuffellaand) is n doarp in de gemeente Loster, in Tweante en wördt duur t eegne volk wal Bukke neumd. t Lig op t oostn van Oldnzel, kort bie de Duutse greanze, en har in 2006 umdebie 3000 inwonners.

De Lut ligt an de A1 en an de spoerliene Hengel-Beantem, mear hef zelf gin treinstasjon. t Doarp is vuural bekeand van t Lutterzaand woer at seend 1974 alle joarn de eerste ploge van AFC Ajax keump oefenn. t Rivierkn n Deenkel hef bie De Lut zin eegne karakter eheuldn.

n Deenkel bie De Lut

Geskiedenisse

De boerskop De Lut heurdn töt 1811 bie t richterambt Oldnzel. Toewmoals har t 4 heurnes: de Roder-, Hengeler-, Molter- en Elfterheurne. In den lestn lea eartieds n Monniknhof. Disn hof wörd al in t tiende joarhonderd eneumd, en heurdn an de abdieje Werdn. De boerderiejn van disn hof, toertieds ongevear 30, steundn tusken Twekkel in t zuudn, en Geulnkaamp (Groafskop Beantem) in t noordn.

Volksgeloof

Ene van de bekeandste sages keump oet De Lut. Hier zol volgens de Lutteners n Kardoeshoond (de Hellehoond) roondloopn. Hee wör völle zeen roondum n koarkhof. A'j um heurdn blekn ko'j dr van op an det binn nen kortn tied ene van oewe femilie oet de tied zol komn. Volgens de verhaaln zol 1 boer dr es n moal neet vuur op de loop wean egoan, mear t deer hebn an evöln en loatn vluchtn. Det har'e weetn: Hee hef n poar wekke doodzeek ewest.

De möaite weard

Bie De Lut ligt nen grootn boomhof, Poort-Bulten.

Bekeande leu oet De Lut

• Frans Zanderink, better bekeand as Boer Frans.
• Harry Nijhuis, strektaalkonsulent