Boudewijn Büch

Boudewijn Büch in 1994

Büch in zien woning an de Bakker Korffstraat in Leiden, 1977

Boudewijn Maria Ignatius Büch (Den Haag, 14 december 1948 – Amsterdam, 23 november 2002) was een Nederlaandse dichter, schriever, bibliofiel, verzamelaar en tillevisieprissentator.

Opgruien

Büch gruide op in Wassenaar in een katheliek gezin mit zes kiender. Zien va had hum bij zien geboorte laoten inschrieven mit een trema op de u, mar in Boudewijns kiendertied wördden zien achtername officieel veraanderd in Buch, zoas ok zien va officieel hiette (de name giet uuteindelijk terogge naor een Duutse immigraant, Johannes Philip Böch). Toch bleef Boudewijn zien achtername zien hiele levend mit punties op de u schrieven. De va was vake verkeerd in de kop, en in zien tienertied scheidden zien olders.

Büch gunk in Leiden en Wassenaar naor de middelbare schoele en woonde 't miest van de jaoren zeuventig in Leiden. Daor leup e schulden op en wördden e failliet verklaord as gevolg van zien dwangmaotige boekenkoperije. Hij verhuusde naor Amsterdam mit det e deur 't cultiveren van contacten en 't schrieven van een bulte stokkies bekender wördden in de literaire wereld. Toe as e daordeur midden jaoren tachtig meer begunde te verdienen wördden zien faillissement opeheven.

Schrieverije

In 1976 debuteerde Büch mit de dichtbundel Nogal droevige liedjes voor de kleine Gijs, die bij de Arbeiderspers kun verschienen daankzij bemiddeling deur zien vrund en bewonderaar Harry G.M. Prick. As schriever wördden Büch bename bekend deur de roman De kleine blonde dood (1985), 't verhaal van een vader en een zeuntien det kört veur zien zesde uut de tied kump. 't Boek hef meer as dartig drokken ehad en wördden in 1993 verfilmd deur Jean van de Velde mit in de heufdrollen Antonie Kamerling en Olivier Tuinier.

Naost romans mit autobiografische elementen, waorin de ongelokkige jeugd en een haat-liefdeverholding mit zien va een grote rolle speult, schreef Büch aover alderhaande volk en onderwarpen daor as e wies mit was, zoas Mick Jagger en 't verzameln van boeken. Hij nuumde humzölf nesofiel (eilaandenminnaar) en schreef een riege boeken aover eilaanden. Behalve boeken schreef e stokkies veur een groot antal tiedschriften, netzölfde welke.

Tillevisie-, radio- en theaterwark

As tillevisieprissentator maakte Büch van 1984 töt 1988 't boekenmagazine Büchs Boeken (vanof 1985 Büch enuumd). Slim bekend wördden e mit 't veur de VARA emeuken reispergramma De wereld van Boudewijn Büch, daor as tussen 1988 en 2001 zo'n 176 ofleverings van uutezunden wördden. Hierin reisde hij de wereld aover um plekken te bezuken die te maken hadden mit een briede riege fascinaties van hum, van schrievers as Goethe en Sylvia Plath töt muzikaanten as Buddy Holly en Roy Orbison, netuurhistorische onderwarpen as de dodo en opmarkelijke plekken waoronder ofgelegen eilaandties. Integrale onderdielen van 't pergramma waren zien jongesachtige, uutbundige fanschop, zien feitenkennis en 't vertellen van vrömde anekdotes aover zien helden.

Büch was ok te zien in quizzen en reclames, en in zien leste jaoren leut e spöllegies uut zien privéverzameling zien in 't praotpergramma Barend & Van Dorp. Wieder was e praotgast bij verscheiden radiopergramma's, en vanof midden jaoren negentig toerde e mit een köppel theaterveurstellings deur Nederlaand.

Verzunnen levend

Zowal veur vrunden as veur een groter publiek höld Büch verzunnen variaanten van zien eigen levend vol, die vake bestunden uut 't vervörmen van waore gebeurtenissen. Zo stelde e een verblief van een paar weken as jonggien in een kathelieke vekaansiekelonie veur as een opsluting veur een jaor in een gekkenhuus, maakte e van zien autoritaire Haagse vader een evlochte Duutse of Poolse Jeud die deuredreid was umdet e as RAF-piloot zien eigen geboortestad had mutten bombarderen, en vertelde e det e echt een jonggestörven zeuntien ehad had, wat niet zo was. Partie vrunden begrepen det e 't mit de waorheid niet nauw naamp, mar confronteerden der hum liever niet mit. Büch was ja niet drok op tegenspraok en kun langdurige vrundschoppen mangs inienen ofbreken.

Büch zien woning an de Keizersgracht in Amsterdam was een soortement museum, mit zo'n honderdduzend boeken en een bulte snipsnaorderijen en kostberheden van aover de hiele wereld. Niet veule volk much der van hum binnenkomen. Hij had een paar relaties mit vrouwlu mar bleef ongetrouwd en woonde in Amsterdam op humzölf. Op zien 53ste kwaamp e in huus uut de tied as gevolg van een hartstillestaand.

Dit artikel is eschreven in 't Zuudwest-Drèents.