Grove

Ne grove of begraevenis is ne ceremony dee hölden wördt as en menske uut de tyd ekümmen is. Rund de wearld beståt vöäle rituälen en gebruken üm en menske 'te röste te leggen' en 'de lätste eyre te bewysen'. In landen dee traditionääl under invlood van abramitiske godsdeenste ståt of stünden (kristendom, jöädendom en islam) is et gebrukelik üm en störven menske in de aerde te begraeven. As et menske by leaven gelöyvig was (of syne family), wördt de ceremony meysttyds leided döär nen afvaerdigden van dat gelöyv.

In vöäle kulturen wördt et störvene lyk van en persoon kremeerd (verbranded). In byvöärbeald asiatiske kulturen wördt dit up nen lössen brandstapel edån, in de westerske wearld geyt et in nen verbrandingsoavend in een krematorium.

In Neaderland kan en menske der vöär kesen üm syn lyf nå syn doud in deenst van de weatenskap te stellen, soudat dee der undersöke med doon künnet en soudat leyrling-dokters lyksnyden ovenen künnet.

As ymand up sey uut de tyd kümt (byvöärbeald as bemanningslid van en skip), kan der vöär köäsen worden üm den persoon en seymansgrav te geaven. Hyrby wördt et lyk in en verswård kleyd draid en oaverboard esat. In vroger tyden was dat noudsakelik, ümdat et untbindende lyk vöär slimme seekdes kunde sorgen. Seymansgraven magt in neaderlandske wateren neet meyr.

Doudgraevers

Oaver de heyle wearld gevt et begrafenisondernemers, dee der wark van maket üm lüde professioneel når et grav te brengen. Vake hebbet de nåbestånden gin idee wo as allens warket en der den kop ouk neet når stån. En ne grove vöärbereiden is vöäle wark, wat rap geböären müt, leevst binnen ne weake. Vandår at disse doudgraevers sik anbedet üm allens te regelen. See delvet et grav vöäraf, sorget vöär ne kiste, de rouwadvertenty in de krante en de versyringen rund de ceremony. Ouk oaverlegget se med de nåbestånden wo as den deenst en et grav nåtyds der uut kümt te seen. Se sorget dat de höäre noch ne lätste mål ekamd sint en böärde bywarked of afsköären (hår groit noch nen set voordan nå et starven). Mangs halet se der makeup-artisten by, dee as et lyk upmaket. Dit kan nöydig weasen as den oaverleadenen döär en swår ungelükke, slimme seekde of te lange wachten med de grove en stark verwrüngen vöärkummen hevt.

Grovegebruken

Vanuut kristeliken hook is enkel begraeven tostån. Vöärafgånd an den dag van de grove kummet de achterblyvers van den douden by mekander üm afskeid van et lyf te neamen. Roumsk-katoliken holdet vake den åvend tevöärten ne åvendwake. Dat kan in den douden syn huus weasen, mär ouk in de karke. Et is gebrukelik üm rouwkaarten te låten drükken wårmed as lüde nöydigd wordet üm by den afskeidsdeenst by te weasen. Ouk wördt der vake nen advertenty in de krante sat.

De nöästen beslutet wee as de kiste geyt draegen. Vake sint dat nöäste verwandten: bröders, kinder of kleinkinder, mär as den douden en hougwaerdig beroop had, sou as in et laeger of by de polity, künnet ouk vakbröders de kiste draegen.. As den oaverleydenen neet souvöäle künnigen had, künnet et ouk de nöäste nåbers doon. In gebeden wåras nåberskap neet sou stark is, künnet familys der vöär kesen üm medwarkers van et doudgraeversbedryv in te hüren.

Vöär de warkelike gravlegging an kan der nen karkendeenst ehölden worden. Neet-kristelike vergårings in en uutvårtcentrum of krematorium kummmet ouk vöär. Vöär den anvang van den deenst stellet sik de nåbestånden in ne rygel up by den ingang üm de deylneaming van alle belangstellenden an te neamen. In den deenst of mis kan den domineer of pastoor nen oaverleadenen gedenken in syne preyke. Vake wordet de anweysigen ouk noch eweasen up öäre eygene vergangelikheid. In wat vryere gemeyndes en in neet-gelöyvige herdenkingsdeenste künnet lüde wat seggen, en gedicht of versken vöärdraegen of den douden herdenken in ne tospråke. Ouk wördt der mangs musik edraid, wat den oaverleadenen selv by leaven hevt uuteköäsen of wårvan as de nåbestånden wüsten dat den douden et mooi vünd.

In Twente was et lange gebruuk üm de kiste up ne platte wage med koobeeste der vöär te vervoren. Dat had der ouk med te maken dat vöäle familys ne düre lykwage neet betalen kunden. In Enter geyt den rouwgang oaver de höyvdstråte når den karkhov. Vanuut den vernyden hang når tradity wördt voordan vaker de ossewage weader anehaald.

Nå den gedenkdeenst versamelet de family, nåbers, künnigen en vakbröders van denne wat uut de tyd is buten up de stråte. De nöäste kearls draeget de lykkiste når buten. Dår skuvet se ne in de lykwage of up en draegköäreken. Dan geyt et heyle spül når den doudenakker, wåras den doudgraever en grav edölven hevt. Dåroaverhen ligt töwwe. By dee grove tillet de nöästen de kiste up de töwwe. Den domineer of pastoor spreakt noch en wöördken, terügverwysend når de preydike van eyrder en düt dårnå en gebed.

Den doudgraever löt de kiste sakken, wårnå as de nöästen, vake de öldste söäne of dochter, de lüde tosprekket üm se te bedanken vöär de belangstelling en kumst. Anslutend künnet de lüde langs et grav loupen üm de lätste eyre te bewysen. By wat karken is et gebrukelik üm en händke sand up de kiste te smyten.

Dan volgt de någrove. In en bygebouw van de karke of et uutvårtscentrum künnet family en belangstellenden noch nåsitten en küeren, vake med koffee of tea en bröödkes der by. De ceremony wördt ofeslöäten med en stükken vöärleasen uut den Bybel en en afslutend gebed. Vöärdat ydereyne når huus hen geyt, hevt ydereyne geleygenheid de nåbestånden starkde te wünsken. Underwyl hevt den doudgraever et grav dichtemaked.

Neadersassisk

Achterhooksk:
Drentsk:
Grönningsk:
Twentsk: grove, begraevenis
Veluwsk: