App

Uut Wikipedia, de vrye encyklopedy

Nen app is een programmaken vuur op mobiele apparaten, zo as smartphones en tablet-komputers. Et woard App is ne ofkorting van et Engelse Application, wat woarktuug beduudt.

Op de meeste apparaten stoat al verskeadene apps vuur-installeerd, zo as nen webkieker, nen e-mailbehearder, agenda en apps woermet a'j muziek, aandere apps en media kopen köant. Een antal vuur-installeerde apps köant der ofhaald worden met ne duursnee de-installasiewieze. Der blif dan mear ruumte oawer vuur apps dee as den gebroeker gearne hef. As de software dit neet toolöt, köant wat toostellen ook ewisket worden um de neet-eweunskede apps der of te kriegen.

Apps vuur et mobiel zeent neet etzelfde as software vuur op desktop-komputers en internet-apps dee as in webkiekers loopt, in stea van direkt op et mobielke.

Gebroek[bewark | bronkode bewarken]

Et doel van apps is um et leawen van den gebroeker lechter te maken of plezeer te beden. Der zeent apps dee as eankel informasie geewt, zo as wear-, verkear- en niejs-apps. Aanderen helpt een meanske um zaken te regelen, zo as e-mailbehear, internetbankieren, agenda's, antekeningen en sproakrecorders. Der zeent ook apps vuur kokbeuke, biehoolden van sport-vuurtgaank, wegbeskriewingen of muzieklusteren.

Wat apps wordt duur bedriewe maakt um öare klaanten better te helpen en öar de meugelikhead te doon um met et bedrief te kuieren. Et is dan ook meteen ne wieze om öar naamsbekeandhead te verstoarken. Bekeande sosjale netwoarken as Facebook gebroekt apps um öare gebroekers verdan te bedenen. Instagram dreeit zelfs heuwdzakelik op mobiele apparaten; op de webstea van instagram zelf köant gebroekers niks.