Airfryer

Ne heyteluchtmöäle uut 2006

Nen airfryer (of heyteluchtmöäle) is en köäkenapparaat üm eaten med to frituren sunder baköäly. Et warket med ne rap draiende möäle dee heyte lucht döär nen bak rundtrekt. Et apparaat kan eaten grillen, bakken, bråden, puffen of fritüren. Wearldwyd sint der al wal verskeidene van verkoft.

Geskedenisse

In 2005 deenden et amerikaanske bedryv TurboChef Technologies inc. en officiääl oktrooi in vöär ne heyteluchtmöäle (Air fryer). Dat was ericht up gebruuk in eatenssaken.

Vanaf den tyd probeerden Philips ouk ne vetpanne to untwikkelen med heyte lucht. Et warkeden allemál wal, mär se kreagen et apparaat neet up sou ne skåle dat et ouk by de lüde in huus gebruked worden kunde. De eyrste untwarpen satten vöäls to ingewikkeld in mekander un solden to vöäle kosten. Uutendelik kreag Philips den uutvinder van de technology van de heyteluchtmöäle, Fred van der Weij, souwyd üm med to warken an en untwarp vöär in huus. In 2010 presenteerden se et nye köäkenapparaat under de name Airfryer up de Internationale Funkausstellung (IFA), ne vöärname böärse vöär konsumentenelektronika in Berlyn. Philips had inmiddels patent up de eygenbedachte Rapid Air-technology. Binnen de kortste keren is de name airfryer algemeyn bekend ewörden un gevt et al heyle koakböker med airfryerrecepte.

Warking

Eaten wåras setmeal in sit kan bruunebakken worden med de Maillardreakty. Vet kan helpen, mär hoovt neet. By bakken med ne vetpanne wördt eaten heylemål underedöyped in heyten öäly of vet. De heyteluchtmöäle warket by deselvde temperaturen as ne vetpanne, mär dan med rundblåsende lucht. By ne heyteluchtmöäle kan når eygen insicht öäly der by dån worden.

Up de meyste heyteluchtmöälen sittet knoppen üm tydsduur un gråden in to stellen, wårmed naar precys ebakken kan worden. Et eaten geyt in ne bakmande, den as lös in nen lekbak hangt. Dår kan de heyte lucht ümhen kringelen. A'j der vöäle in doot (sou as patat), mu'j et spül regelmåtig eaven ümmeröderen. Med wat öäly der by wördt et eaten minder gauw dröge, un kryg y et gauwer bruun.

Döärdat der döärgåns minder vet by et eaten geyt as by andere förme van frituren, kan et lük anders smaken. Döär to spöälen med de baktyd un temperatuur is de frituursmaak anders noch good nå to bootsen.

Feitelik is der weinig verskil tüsken nen heyteluchtoavend un ne -möäle, mär ne möäle is döärgåns kleiner un kan ouk minder heyte worden. By et apparaat sint ouk noch pizzaplaten, taartförme of andere insteakbäkke by to krygen.

Soorten eaten

De volgende soorten eaten künnet good in ne heyteluchtmöäle bakken worden:

• patat
• hennenvleisk
• hamburgers
• beefstük
• afbakbröydjes
• lumpia's
• skinken
• viske
• taarten
• quiche
• eier, (a'j der mär ne pocheerskåle by gebruket)
• aerdappel un gröönkost (puffen)

Nådeylen

• by chips un andere lechte snacks müt der ne syge of röyster oaverhen, anders vlögt et spül alle kanten uut

• sunder hülpmiddel kan der niks in wåras nat beslag ümhen sit, sou as öälybollen, beignets, tempura, lekkerbekkes of kibbeling

Vöärdeylen

• minder vet eaten
• selvemakede patat kan med weinig of selvs sunder öäly ebakken wörden
• klein apparaat
• ginnen vetten kolder of stank
• minder kans up brand.
• makkelik skoune to maken (de uutneambåre deylen künnet sou in den vaatwasker)
• vöäregårde eaterye makkelik af to bakken, sou as öälykneppen un kibbeling
• gebrukt eavenvöäle ströym as ne vetpanne un heyl wat minder as nen heyteluchtoavend
• baktyd un -temperatuur makkelik in to stellen
• epofde aerdappel kan by laege temperaturen
• et eaten düt minder vet an