Revue

Oet Wikipedie, de vraaie enzyklopedie
Gao naor: navigasie, zeuk

Ne revue is in t Neersassiese gebeed ne plaatselike toneelverenige, dee't ne grote anhaank hef. Ne revue-vuurstellige hef vake oonderwoarpe oet t dagelikse leawn, värskes en daansstuks. In Tweante goat de revues vake oawer de beleawnisse van ne boernefemilie. Vake zeent dr ne grotvaa en grotmoo, vaa en moo en nen knecht en ne meid of ne zönne en ne dochter.

As achtergroond wörd vake de kökne (t kokhoes) of de vuurgewel van t boernhoes gebroekt.

Ne revue kan ook op kleaindere skale oet evoerd wordn, zo as bie sport-, buurt- en muziekvereniges. Dit gebuurt dan vake op n lesten oefenoawnd (n feestoawnd), woerop at dan opmoarkelike vuurvaln van t ofgeloopne joar de revue passeert, en verskilnde leu dr duur wordt ehaald. t Woard revue keump oet t Fraansk en beteeknt dan ook vanniessen oonder n andacht brengn.

Ne regionaal bekeande revue was de Wierdense Revue. Disse revue kreeg vuural bekeandheaid duur t optreden van Joke Wanschers-Eshuis (1920-2001) in de rolle van Dika. De Wierdense Revue was zo geleefd det ze verskeaidene elpees en CD's hebt oet egeewn.

De humor zit um vuural in woordgräpkes en lachweknde saamnloop van umstandigheedn. n Bekeand stukn is dus ook van de Wierdense Revue, woerin at Dika verteelt det Graads te völle hef edreunkn en met de fietse op n kop in n sloot geet. Dika haalt dr n dokter bie en den zegt det Graads boetn bewustheaid is. Graads skreewt vanoet n sloot: "De's neet! Ik bin nit boetn bewustheaid!" Woerop at Dika röp: "Stille Graads, wol iej t nog better weetn as n dokter?".

Bekeande revues van rechtevoort zeent Twenteplat en Drentheplat, woermet vuural ook Karel van de Kate bekeand is ewördn.

De vuurmoalige juteweaweriejn van Ter Horst & Co oet Riessen in Tweante hadn ne eegne revue van t woarkvolk. Doo't Ter Horst oawer n kop gung, was t ook edoan met de Ter Horst Revue. Disse revue kreeg later n niej leawn duur Harm Agteresch, den t umdeupn dee töt De Riessense Revue. Hee kreeg t ook vuur mekoar um verskeaidene revues oet de umgewing saamn te loatn spöln in grote toneelstukke, zo as "n Skearbaas van Riessen" en "Tsaar en Timmerman" met revues oet Eanter, Hooltn.

De Eanterse Revue "Met Mekaa" dut alle joarn ne Tweantse versie van t bekeande Dickensverhaal Scrooge (vrek), den at vertaald is duur Gerrit Kraa.

Oetgoande verbeendige[bewark | bronkode bewarken]