Piramide van Kheops

Oet Wikipedie, de vraaie enzyklopedie
Gao naor: navigasie, zeuk
Etalazie-artikel
Piramide van Kheops

De Piramide van Kheops of de Grode Piramide is ain van de zeuven klassieke wereldwonder. De piramide van Kheops was tot en met de 15e aiw t hoogste gebaauw ter wereld.

Mit zien hoogte van sikkom 146 meter was hai vaar millenniums laank t hoogste gebaauw ter wereld. De piramide is om en bie 230 meter braid en telt om en bie 2,3 miljoen stainen van elk 2,5 ton. De inhold is om en bie 2,6 miljoen m³. Man het volgens t overlevern van Herodotus 30 joar over de baauw doan. Nèjmoodse analize van de baauw van de piramides het aantoond dat dit n haile realistische baauwtied is.

De piramide van Kheops môkt duil uut van n komplex van drij grode piramides en zes leutjen. De grode piramides binnen dij van de faraos Kheops (of Khoefoe), Khefren (of Khafra) en Mycerinus (of Menkaure). Zie wuiren baauwd tuzzen 2551 en 2472 veur Kristus en binnen dankzai heur zeer stabiele konstruksie goud bewoard bleven. De boetenste witte kalkstainloag is in de loop van de tieden grotenduils verdwenen, omdat de stainen in de Middelaiwen bruukt binnen veur andere baauwwaarken, woaronder de stad Kairo. De opdrachtgever veur dit moetwekkend baauwwaark was farao Kheops dij tuzzen 2587 en 2564 veur Kristus regeerde. De piramide was beduild as graf en stelde de heuvel veur woarop de zunnegod Ra stoan har dou hai de andere goden en godinnen schoapen har.

De piramide van Kheops wordt voak in verband bracht mit spirituele filosofien, ook wel pyramidologie nuimd.

De baauw[bewark | bronkode bewarken]

Grode Galerij (foto: Peter Prevos)
Gaange

Aan de grode piramide wuir middelkerwies meer as 20 joar waarkt, môr in tegenstelln tot wat veul mìnzen denken waren t gain sloaven dij deraan waarkden môr betoalde aarbaiders. Der wuiren leutje gravvies vonden bie t plateau van de piramides. Dizze groaven waren versierd mit bogen, pleisterwaark en walschilderns. Boven de ingaang van dizze groaven gong n stuk kalkstain mit doarop de noam en de titel van de persoon dij in t graf lag. Dit wiest erop dat de waarkers hoogploatste personen waren.

t Binnenste van de piramide bestond uut ploatselke kalkstain en doarboven wuir n loag van polijste kalkstain legd woardeur de piramide leek te klandern in t zunlicht. De top wuir ôfdekt deur dekstainen dij meugelk van gold waren. Vandoag de dag is dij toploag huilmoal votsleten. De menaar woarop zai baauwd wuir is aands nog n groot roadsel. De maiste geleerden denken dat de stainen noar boven brocht wuiren via n trans dij aan de boetenkaande van t piramide laanksluip. Wat ook opvaalnd is, is de verholden met de piramides van Mycerinus en Khefren. As man de stand van de piramides vanuut de lucht bekik, stoan zai presies liek mit de gördelsteerns Alnitak, Alnilam en Mintaka van t konstelloatsie Orion en is de grootte ook vergeliekboar mit de kloarhaid van dizze steerns. Dit bewiest dat de Egyptenoarn veul wozzen van wiskunde en steernskunde.

Binnende struktuur[bewark | bronkode bewarken]

De oorspronkelke ingaang van de piramide bevindt zuch aan de noordziede. Dizze ingaang was in de oldhaid open, môr wuir deur eerdbevens weer verbörgen. In de 10e aiw het n Aroabische schatgroaver n nèje ingaang in de noordziede môkt en zo tougang geven tot de binnende struktuur. Vanuut de ingaang lop n doalnde gaange om en bie 1 deur tot in de rotse onder de piramide tou. De gaange komt uut in n nait ôfmôkte ondergrondse ruumte. Op t doalende gaange sloet n omhoog goande gaange aan, dij uutìndelk laaidt tot de grafkoamers. Dizze gaange is ook huil klain en was oorspronkelk van de doalende gaange ôfsloten deur middel van granieten pluggen. De omhoog goande gaange komt uut in de galerie, n imponeernde konstruksie in t midden van t piramide. De galerie gef tougang tot twij grafkoamers. De koamers binnen huil verschillend van eerd en in gain van de koamers binnen resten vonden van n utegste. n Intressant detail in aalbaaide koamers is de aanwezeghaid van zonuimde luchtschachten in de noord- en zuudwanden. De schachten binnen enkeld 25 sìntimeter braid en hoog. De schachten in t onderste koamer stoppen midden in de piramide. Körtleden onderzuik met n robotkamera het aantoond dat dizze gangen naargens uutkommen. De schachten in de bovenste koamer goan deur de huile piramide hìn, vandoar dat zai luchtschachten nuimd worden. Gain enkel ander Egyptische piramide het zulke schachten.

Zoal van Archieven[bewark | bronkode bewarken]

Ain van de meugelke koamers dij de archeologen nog aantreffen zellen kinnen is de zonuimde zoal van archieven.

Der is n duil van waitenschoppers, mit aan t hoofd t medium Edgar Cayce, dij mainen dat t baauwwaark dateert uut 10.000 veur Kristus en baauwd is deur Atlantiers. Dizzent zollen in ain koamer allerlij dokumenten verbörgen hebben.

Der bestoan anders ook meer waitenschoppelke gegevens dij dizze theorie ondersteunen. n Oale tekst uut t Oale Egypte vertelt ons noamelk over n farao dij op zuik gong in de piramide om der de wieshaid van Thoth te vinden. Dizze verhoaln binnen wieder overleverd en de Grieken mainden dat de piramide t graf was van de god Hermes.

De aanhang veur de theorie van verbörgen koamers bleef bestoan bie de Aroabiern. Zo leut de kalief Al-Mamoen om en bie 820 n gat môken om in de piramide op zuik te goan noar verloorn kennes. Ook onder nèjmoodse egyptologen bestond de drang om op zuik te goan noar verbörgen kennes.

Schatten[bewark | bronkode bewarken]

De maiste farao's wuiren utegd mit aalmoal weerdevolle schatten. In de piramide van Kheops wuir aands weinig tot niks vonden, omdat der al grafrovers op bezuik wèst waren. Noast de piramide wuir aands n zeer goud bewoarde zunnebark vonden. Dit was de boot woarmit t lichoam van Kheops vervouerd wuir noar zien graf. Wat ook schier om waiten is, is dat der musschain nog n farao in de piramide begroaven was: onder t baauwwaark, tuzzen de grode gaange en de twaide grafkoamer, von man n uuthaauwen ruumte woarin musschain n farao uut n eerdere dynastie begroaven lag.

Hìnwiezen[bewark | bronkode bewarken]

Nuvola apps ksig.png Schreven in t Veenkelonioals