Zönnebekke

Zunnebek (Nederlaands: Zonnebeek) is ne boetenplaats en biejheurend laandgood. 't Lig op et noorden van et Buurserzaand an de Zonnebeekweg met oetzich oawer de heade van et Osselerveald.

Geskiednisse

Et laandhoes wör tusken 1906 en 1907 bouwd noar ontwearp van architect A.G. Beltman veur J.B. van Heek en zien vrouw, Edwina van Heek - Burr Ewing. Et ontwearp is baseerd öp et laandhoes van Edwina's moor, dee in Nashville, Tennessee in de Vereanigde Stoaten van Amerika geboren was.

Architectuur

Et landhoes is optrökken in neoklassieken stiel. Et hef witpleisterde gevvels en skilddak met kapellen. An de ziedkanten zit nen skouw. 'n Veurgevvel is strak symmetrisch en sprink in de midden lech noar veurten. Et hef een balkon wat op zoelen lönt. Der boavenop zit een timpaan met een rozenveanster der in. Et balkon is ofkekken van olde plaantershuze, zo as dee op Amerikaanse plantages bouwd wörden. Ok de westergevvel har eerst een balkon, mar doar hebt ze in 1911 ne serre van maakt.

Laandgood

De boetenplaats hef heel wat geskiedenis. Nöast et laandhoes is der ok nen hof, een koetsenhoes met stallen, een deensthoes, garage, kapskure, greuntenhof met sköppe, teehuuske, skoapenskot en doewenhok. Op et hek steet 'n tekst 'Zonnebeek'. Ontwearp van 'n hof steet op naam van P.H. Wattez, den et ofkekken hef van de Amerikanen. Rond 1908 is der nen bongerd met greunte- en blomenhof biejkommen, met muren en heagen der umhen. In 1972 hef architectenburo T.H. Koning et opknapt en opniej vörmgevven.

Stie in de samenleaving

Jan Bernard zien breur, Jan Herman van Heek, hulp op 15 november 1946 de stichting Edwina van Heek in de been. Heel wat kulturele projecten in Oaveriessel en 'n Achterhook kriegt der centen van. Ze beholdt natuurmonunementen, monumentale panden en kunst. Ook Zunnebek valt onder de stichting. 'n Hudigen beheerder wont op 'n zolder van et hoes. Et hoes en park ma'j nich in, mar et landgood kö'j wal op.