Roonde van Fraankriek
De Roonde van Fraankriek (op zin Fraansk: Tour de France [ˌtuʀdəˈfʀɑ̃ːs], vake körtweg De Tour eneumd) is ne wielerwedstried den at vuur n groot deel duur Fraankriek geet. Samen met de Roonde van Italië en Spanje wörd t erekkend töt ene van de dree Grote Roondes.
De Roonde van Fraankriek is oontstoan in 1903, en wör doodestieds op ezat duur Henri Desgrange, den't heuwdredakteur was van t blad L'Auto. Hee har t idee van ene van zinne woarkleu, Georges Lefèvre, den't direkteur van de eerste Roonde wör. Seend dee tied is de Roonde oet egröaid töt belangriekste en meest earvolle joarlikse wielrenwedstried van de wearld.
De meeste Roondezeages stoat op naam van n Amerikaan Lance Armstrong, den't de roonde zeuwen moal op riege wun (1999-2005). Doarnoa komt twee Fraansken Jacques Anquetil en Bernard Hinault, n Belg Eddy Merckx, en Spanjool Miguel Indurain, dee't ne allemoal vief moal wunnen.
Priesverdeling
[bewark | bronkode bewarken]De roonde besteet oet verskeaidene dagritten, de etappes. Den radloper den't de totale tied van dee dagritten t vlotste ofleg, wint de roonde. Den radloper den't gedoerende de Roonde boawenan in de lieste steet met de körtste dagrittieden, krig ne gelle trui an. n Gelle truidreager mut dus zorgen det he aait good met keump, aanders beent aandere renners um te vlot of, en is he zinne gelle trui wier kwiet.
Der zeent ook aandere truikluren te winnen: de greune trui is vuur n besten sprinter. Gedoerende de dagritten beent verskillende peunten te winnen duur te sprinten noar n bepoald peunt in n dagrit, of an t eande van zonnen dagrit. Wee't bie zulke sprints de meeste peunten haalt oawer de hele Roonde, mag de greune trui metnemmen noar thoes.
De doarde truikluur is de bollekestrui. Det is ne trui met rode stippen. Disse trui is vuur n besten klimmer. Op elken boarg woeras de radlopers tegenan mut is n antal peunten te winnen as ze doar as eerste ankomt. Nen froai stikken boarg leawert mear peunten op as n lecht heuwelken, en seend eankelte joaren wordt de peunten vuur n lesten boarg van elken dagrit verdubbeld.
De leste trui is de witte trui. Dee is vuur radlopers oonder de 25 joar oold dee't t heugst in de eandlieste stoat.
Oetgoande verbeendige
[bewark | bronkode bewarken]
|
Commons: Roonde van Fraankriek - plaatjes, filmkes en/of gelüüdsbestanden. |