Tikibar

Uut Wikipedia, de vrye encyklopedy
Nå navigaty springen Nå söken springen
Interieur van een tikibar in Portland in de Verienigde Staoten
Ingaank van een tikibar in Cardiff, Wales

Een tikibar is een bar daor aj cocktails kunt drinken en die uutedost is um oe in de sfeer te bengen van een tropische umgeving, in 't bezunder die van Polynesië. De cocktails zit vake van alles in, mit rum as vast bestaanddiel. Der bint klassieke cocktails onder zoals de Mai Tai, waor as wieder nog curaçaolikeur, orgeadesireup en limoensap in zit.

Tikicultuur[bewark | bronkode bewarken]

't Decor van tikibars grep terogge op de tikicultuur. Een tiki is in Polynesië een holten of stienen bield van een estileerde mèenselijke feguur; in de mythologie van de Maori was Tiki de eerste manspersoon. De tikicultuur, zoas die in de jaoren dartig van de 20ste ieuw ontstund in de Verienigde Staoten, kump neer op een romantische kiek op tropische eilaandculturen. Daoronder vaalt beveurbield hulamaagiesmotieven, palmbomen en holtsniedwark in de Polynesische stiel. Ok hej kroezen van diggelgoed in de vörm van een tiki, een kokosneute of een vulkaan; zokke kroezen heet in 't Engels tiki mugs.

Der bint tikibars die eterije serveert of die live-meziek hebt, mangs mit Polynesische daans derbij.

Achtergrond[bewark | bronkode bewarken]

Tikibars bint in de jaoren dartig in Californië ontstaon. De eerste mut Don's Beachcomber ewest hebben, in 1933 lösedaone in Hollywood. Een aandere vrogge ketten, die nog altied bestiet, is Trader Vic's. Veul vrogge tikibars maakten onderdiel uut van hotels of van grote Aziatische restaurants. De tikicultuur raakte nog wieder in trek deur Amerikaanse saldaoten die nao de Tweede Wereldoorlog weerumme kwamen van 't striedteniel van de Stille Zuudzee, en deurdet Hawaï in 1959 bij de Verienigde Staoten kwaamp.

Nao de jaoren zestig raakten tikibars oldmoeds en gungen der hiel wat dichte. Vanof de jaoren negentig, begun neie ieuw, was der weer liefhebberije veur en breidde 't concept hum ok uut naor aandere laanden, veural in Europa.

Nuvola apps ksig.png Dit artikel is eschreven in 't Zuudwest-Drèents.