Stephen King

Uut Wikipedia, de vrye encyklopedy
Nå navigaty springen Nå söken springen
Stephen King

Stephen Edwin King (Portland, Verienigde Staoten, 21 september 1947) is een Amerikaanse schriever van horrorromans, -novelles en -verhalen, wie zien wark hum ok begef in de genres van de thriller, de misdaod, de sciencefiction en de fantasy.

King hef meer as 60 romans en meer as 200 verhalen eschreven, waorvan der bij mekaar roem 350 miljoen exemplaren verkocht bint. Een best antal dervan bint speulfilms, tillevisieseries, miniseries en stripverhalen van emeuken. Veur zien wark hef e een tritse priezen ekregen, waoronder in 2003 een medallie van de Amerikaanse National Book Foundation veur zien vernimstige bijdrage an de Amerikaanse schrieverije.

Onder zien bekende romans vaalt zien debuutroman Carrie (1974), aover een etreiterd maagien mit telekinetische krachten, The Shining (1977), aover een conciërge die in 't leegseizoen mit vrouwe en zeuntien op een ofgelegen hotel past en daor niet hielemaole wies wördt, Cujo (1981), aover een Sunt-bernard die best te passe is mar hondsdol wördt nao een vleermoesbeet, It (1986), aover een plaatsien det eplaogd wördt deur een moordzuchtige baovennetuurlijke clown, en Misery (1987), aover een schriever die evangen eholden wördt deur zien grootste fan.

King zien griezelverhalen bint vake esitueerd in kleine, hechte Amerikaanse gemienschoppen - nogal ies in zien eigen noordoostelijke contrei New England. Aspecten van de Amerikaanse popcultuur - appeltaarte, honkbal, rock-'n-roll - wördt bried uutemeten en liefdevol beschreven. In 't jaor 2000 kwamen King zien memoires uut, On Writing, waorin e zien gedachten aover 't schrieversvak uutienzet.

Van de vrogge jaoren zeuventig töt de late jaoren tachtig hef King een perbleem ehad mit alcohol- en drugsmisbruuk. Sinds een interventie deur zien femilie en vrunden is e weer nöchtern. In 1999 raakte hij aordig beschendeliseerd toen hum de ofeleide bestuurder van een bussien anreed, mar hij wus goed te herstellen. King is sinds 1971 etrouwd mit de schriefster Tabitha King (geboren Spruce); de beiden hebt drei kiender en vier kleinkiender. Hij is fan van honkbalploeg de Boston Red Sox.

Nuvola apps ksig.png Dit artikel is eschreven in 't Zuudwest-Drèents.